Lungz Byauh baez vut fagcax, sikhaek naengh roengzbae, doq song fwngz haenqrengz nyaenx gahengh doq swenj:

“Dai lo, dai lo, cungj ngwz- caetyamq ceiq doeg lo, Siu Cuh……”

Saeknaj Siu Cuh haunyo, baez bongh, laemx youq dangqnaj Lungz Byauh, aj bak iq roengzrengz sup gij sieng gahengh Lungz Byauh, mbangj lwed deng sup okdaeuj lo, biq ok youh laebdaeb sup, Siu Cuh mboujguenj Lungz Byauh get mbouj get, gij rengz gwn cij cungj sai okdaeuj lo, gij lwed daj baksieng gaemz he gaemz he deng sup okdaeuj, Siu Cuh youq gwnznamh biq le dan lwed.

“Siu Cuh……”

Lungz Byauh nyaenx in, gig gamjgik Siu Cuh, itseiz hix mbouj rox yaek baenzlawz gangj cij ndei, cij ndaej lumj fangzhwnz gangj vah nei nam:“Haeujsim, ciengeiz gaej ndwnj saekdi myaiz roengz conghhoz. Cungj ngwz neix ceiq doeg lo, bouxvunz deng de haeb youq 7 yamq ndawde couh yaek daidoeg bae……”

Siu Cuh mbouj ndaejhoengq dap gij vah Lungz Byauh, de gaenq sup ndaej naengbak mwnh caemhcaiq linx in lo, hanh caeuq raemxda caez lae roengz, ienqhoij simluenh doxgyaux, gij saeh wnq de gaenq vut daengz baihlaeng, bonjfaenh miz mbouj miz yiemj hix mbouj haeujsim lo.

“Ndei lo, Siu Cuh.”

Doeklaeng, Lungz Byauh rox- nyinh Siu Cuh saedcaih mbouj miz rengz caiq sup lo, song fwngz bungj faj naj Siu Cuh hwnjdaeuj, gwnz naj de raemxda caeuq hanh rimrad. Lungz Byauh mbouj hawj de caiq sup lo.

“Mbouj miz maz yungyiemj luba?”

“Aiq gij doeg cungj deng mwngz sup okdaeuj lo.”

“Lungz Byauh——”

Ndang Siu Cuh baez nyengq, laemx coh henz bae. Lungz Byauh vuengmuengz iet fwngz bae umj, got Siu Cuh haeuj ndaw rungj bae. Songde cungj ninz youq gwnznamh.

“Siu Cuh, Siu Cuh! Mwngz baenzlawz lo?”

(caengz sat)