Vwnz Sih okbae baihrog gaenq ndaej geij bi lo, neix gyoengqvunz Ginhcah Yangh bouxboux cungj rox. Hoeng mbouj miz byawz rox de dauqdaej youq gyawz caemhcaiq dai lix mbouj cingcuj. Vihneix boh meh de hwnzngoenz gwn mbouj van ninz mbouj ndaek.

Caiq gangj bi’gvaq dahnuengx de Vwnz Linz yaek guh laeuj doxaeu, deng aen ci ndeu gyanx dai bae lo, boh meh Vwnz Sih raemxda lae hawq lo.

“Baeuqgeq, Vwnz Linz gaenq biek bae gaenh bi he lo, gou ciengz- ciengz loqraen de daenj buh moq baebae dauqdauq, mboujnex raeuz couh……” Meh Vwnz Sih naeuz.

“Gou rox, caj daengz ranz moq raeuz hoemq dingj le, raeuz couh youq ranz moq vih de guh laeujyaem, hawj de youq lajyaem youq ndaej onj.”

Ginhcah Yangh Mbanjdiendangz miz aen sibgvenq ndeu, danghnaeuz bouxcoz caengz baenzranz dai bae le, ndawranz cungj aeu vih bouxdai banh laeuj, neix heuhguh “laeuj- yaem”, hawj bouxdai youq lajyaem baenzgya baenzranz. Guh laeujyaem yaek aeu fiengz daeuj nyaenj baenz song boux vunzgyaj, youq gwnz ceij sij gij coh bouxdai le nem hwnj ndang vunzgyaj bae, daenj buh moq vaq moq hawj boux vunzgyaj, gaj mou、gaj bit、gaj gaeq、gaj yiengz, heuh goengdauh daeuj soengq. Guh laeujyaem, lumj bouxvunz doxaeu banh laeuj nei nauhyied.

Boh meh Vwnz Sih doxyaeng le, ngoenz daihngeih gyanghaet, meh Vwnz Sih couh caeuxcaeux hwnqdaeuj bae ra Vuz goengdauh, Vuz goengdauh rox yawj ngoenzndei.

“Caet nyied cocaet, ciuhgeq miz roeg dap giuz hawj Niuzlangz Ciznij doxraen, ndaw sawlig hix naeuz ngoenzde dwg ngoenzndei, couh dingh youq ngoenzhaenx ba!” Vuz goeng- dauh naeuz.

Liz ngoenz caet nyied caet mbouj nanz lo, meh Vwnz Sih gipgip muengzmuengz dauqma. De byaij gvaq bakdou ranz Ginh Ginh seiz, Ginh Ginh cingq gwed cae yaek bae cae reih.

“Ginh Ginh mwngz dingz yaep ndeu, mehbaj miz vah caeuq mwngz gangj.” Ginh Ginh cuengq fagcae roengz, meh Vwnz Sih dep daengz goekrwz Ginh Ginh bae gangj:“Ginh Ginh ha, daj song duz lwg gou mbouj youq le, maz cungj ra mwngz bang guh, cungj dwg mazfanz mwngz, haxbaenh gou bae ra Vuz goengdauh, de naeuz caet nyied caet dwg ngoenzndei, baenz hawj Vwnz Linz banh laeujyaem, gou naemj hawj mwngz daeuj bang gou geij ngoenz.”

Gangj daengz Vwnz Linz, mbouj gangj lij ndei, baez gangj Ginh Ginh ndawsim couh simcieg. Aenvih Vwnz Linz caeuq de daj iq couh itheij guhcaemz, doeklaeng itheij doegsaw, majhung le doxndiep doxgyaez.

Bihaenx, de caeuq Vwnz Linz yaek hwnj cungdenj gauhcungh, de gauj ndaej, hoeng Vwnz Linz gauj mbouj hwnj, bonjlaiz Vwnz Linz yaek fukdoeg caiq gauj, hoeng……

Roek caet nyied, daengngoenz cungj dwg ok ndaej gig vaiq. Miz ngoenz he, Vwnz Sih ninz ngamq hwnq, nditndat couh ciuq ndaej gyang ranz ronghsagsag.

“Boh, ngoenzneix gou bae haw cawx gyu, gyoengqsou gwn haeuxngaiz gaej caj gou lo.” Vwnz Sih naeuz.

“Ei, bae vaiq dauq vaiq.”

Vwnz Sih yamq ok bakdou, song duz a gvaenxgvax youq bakdou ranz hemq mbouj dingz.

Daengngoenz doek bo lo, lij caengz raen Vwnz Sih dauqma, bohmeh gwq caj gwq caj lwgmbwk, muengh bae muengh dauq, doeklaeng dawz dienhdoengz bae cam gyoengq- vunz caez bae haw, miz vunz naeuz raen Vwnz Sih hwnj aen ci rag huq bae lo.

Vwnz Linz ndaej rox le, de mbouj miz sim doegsaw lo, guhcaeg buet maranz, ndawranz boh meh gaenq daej raemxda rim naj liux. De gietdingh mbouj laebdaeb doegsaw lo, daegbeix mbouj rox bae gyawz lo, hix mbouj gangj mingzbeg, ndawranz boh meh aeu miz vunz doxbuenx, caemhcaiq boh meh mbouj miz sim guh hong, bae gyawz ra ngaenz soengq de doegsaw?

Ginh Ginh rox le gig nanzgvaq, hoeng mbouj miz banhfap bang Vwnz Linz, cijndei moix daengz singgeiz roek dauqma, bae ranz de nainai de.

3 bi yaepyet gvaq ndaej gig vaiq, youq Ginh Ginh yaek gauhgauj seiz, daxboh Ginh Ginh hwnj bo bae raemj faex deng doek roengz dat sang, goenqheiq bae diegsien lo. Mbouj miz vunz canh cienz ciengx bak, gij loqmuengh hwnj daihhag Ginh Ginh couh lumj bop raemx dek nei, cijndei dauqma ranz guhhong.

Ginhcah Yangh Mbanjdiendangz, dwg daengx yienh rin ceiq lai dat ceiq sang, raemx gwn noix, mbouj doeng roen, gwnz bya mbouj hwnj nya, ndaw reih mbouj maj haeux. Ginh Ginh dwg boux vunz gaenx ndeu, moix ngoenz rongh ok laep dauq.

Vunz lajmbanj ndaej doegsaw lai gig noix, Ginh Ginh doeg gvaq gauhcungh, mbouj geij nanz ndaw mbanj vuenh gaiq senjgij, de ndaej biuq ceiq lai, doeklaeng couh ndaej dang cunh cujyin.

Vwnz Linz gig sim’angq, moix baez raen Ginh Ginh cungj riu- nyumnyum caemhcaiq gyaez lumh- lumh gij byoem raezrangrang bonj- faenh.

Ngoenzhaenx Vwnz Linz cingq youq ndaw reih gip duh, Ginh Ginh caegcaeg daeuj daengz baihlaeng de, yungh song fwngz caegcaeg got de, Vwnz Linz faj naj sikhaek nding lumj gwn laeuj gvaq nei, nyaenqlili gangj:“Mwngz dwg baenzbag ha? Mbouj ndaej guh yienghneix ne, hawj vunz raen mbouj ndei.”

Bi daihngeih seizhah, reih haeuxyangz maj ndaej mwncupcup, ranz Vwnz Linz cij miz boux dog guh- hong, ganj mbouj gib, ndaw reih gorum maj ndaej gig vaiq, Ginh Ginh daeuj bang Vwnz Linz, caeuq de itheij ndai reih.

(caengz sat)