Gou gyaez ndwencieng, gyaez gij feih ndwencieng.

Lij caengz daengz ndwencieng, gou couh hainduj siengjniemh gij feih bauqrengh lo.

Muengh dwk muengh dwk, ndwencieng dauqdaej daeujdaengz lo. Ranzranz hohhoh cungj cuengq bauqrengh. Mwngz yawj!

Daxboh caeuq daxau riuj roix bauqrengh youq ndaw fwngz diemj dawz, gij sing bauq caen hung ha, saenq ndaej gou goemq rwz hwnj, lau aenrwz deng saenq nuk. Bauqva saeknding saekhenj youq gyangmbwn sinz ok, caen ndeiyawj ha! Gou angq ndaej hemqyaya. Gou geizheih dwk cam daxboh, bauqva vihmaz mbouj mbin hwnj mbwn bae ne? Daxboh riu le, lwnh gou, gij bauqva sinz coh seiq mienh bet baih, de dwg dawz moix aen hohfuk soengq daengz cien gya fanh ranz, hawj vunzlai cungj ndangcangq、 vuenyungz.

Ndwencieng daeujdaengz, gwnzgai lajmbanj gizgiz cungj nyouq daengz feihhom. Gak cungj gijgwn ndeigwn hawj vunz myaiz rih. Nohgaeq、nohbit、nohmou、faengx、nienzgau…… cungj dwg doxgaiq ndeigwn.

Ndwencieng lij miz haujlai feihhom: Feihhom mbawdoiq, feihhom diuzyieng, feihhom buhmoq…… Yienghyiengh cungj iemqhaeuj sim vunz bae. (sam nienzgaep Wuz Mingz)