“Lwgbauq goksag swz bigaeuq, rumzcin raeujrub ci haeuj ranz”, gvaqcieng lo, guek raeuz gizgiz cungj angqangq yangzyangz !

Ngoenzndaep gaxgonq, ranzranz cungj baet ranz, ndaw ranz gungx- gungx gokgok cungj baet ndaej seuq- satsat, angqcoux bimoq daeujdaengz. Baet ranz seuq le, daxboh daxmeh couh daiq lwgnyez bae haw cawx buhvaq moq, cawx diengz cawx bingj banh doxgaiq gvaqcieng, gwnz haw vunz caen lai, yawj hwnjbae cungj dwg gyaeuj vunz, mbwn caiq nit, hoengheiq hix bienq raeuj lo!

Ngoenzndaep, ranzranz gaj bit gaj gaeq, bouxmiz lij gaj mou gaj yiengz, ganj guh byaek haemhndaep, ndaw mbanj dauqcawq dwg heiqhom laeuj noh.

lij miz aengoj gangj ne! Dingq daxgoeng daxbuz gangj: Doenghbaez, miz doenghduz geizgvaiq ndeu heuhguh “duzcieng”, seizcin caengz daengz, mbouj miz gijmaz gwn, couh daeuj ndaw mbanj haeuj ranz bae caeg gwn, gyoengqvunz lau raixcaix. Hoeng, miz baez ndeu, “duzcieng” youh daeuj caeg gwn lo, dingjlingz miz daegmbauq ndeu youq ndaw gyanghongh cuengq lwgbauq, “duzcieng” dingqnyi sing bauq yiengjbungbung, lau ndaej buet deuz- yuyu. Gyoengqvunz lij raen “duz- cieng” dwg saekhoengz. Yienghneix, gyoengqvunz gvaqcieng seiz couh cuengq lwgbauq, nem doiq hoengz, nem mbawveh, “duzcieng” caiq hix mbouj gamj haeuj ranz daeuj lo, daihgya couh bingzbingz onjonj, angqvauvau gvaqcieng lo!

Nem doiq dwg cienzdoengj guek raeuz, de dwg aen maqmuengh gyaeundei vunzlai. Ndwencieng cawz- le nem doiq, ndaw ranz lij nem mbawveh, gwnz conghcueng nem ceijraed dem.

Haemhndaep, daengx ranz vunz mbouj hwnj congz ninz, bouxcoz yawj densi lenzvanh vanjvei, bouxlaux byoqfeiz gangjgoj, lwgnyez cix angq- yangz buet bae buet dauq guhcaemz, caj aeu cienzlokmaj. Yaek daengz gyanghwnz cibngeih diemj cung, bouxboux cungj cimyawj aencung gwnz ciengz, ndaw bak caez riengz ndaw densi hemq: “Cib、gouj、bet……sam、ngeih、it, bimoq vaiqlag!” Lwgnyez diuqyatyat, bae coh bouxlaux aeu cienzlokmaj. Seizneix, ranzranz bakdou dwk bauqrengh bauqienva, sing bauq yiengj raq doek raq, vabauq hai rim gwnz mbwn, aenmbwn laepraurau haenx sikhaek ronghsag, couh lumj gyangngoenz ityiengh lo.

Coit couh yienghneix youq ndaw nauhyied yaengyaeng daeujdaengz lo. Vunz ndaw mbanj raen naj cungj naeuz “goengheij”, “goengheij fat- caiz”. Ceiq angq dwg lwgnyez lo, seizbienh gwn gijgwn ndeigwn, doiq bouxlaux gangj sing “goengheij”, couh ndaej aen hoengzbau ndeu.

Haet co’ngeih, dou couh bae ranz daxdaiq baiqnienz lo. Ranzdaiq lwgsau lwggwiz vaihseng cungj daeuj lo, nauhyied dangqmaz, gak cungj ndeigwn baij rim daiz.

Ndawcieng mbanjmbanj cungj guh hozdung, lumj bengcag doxdax, dwk lanzgiuz doxdax, lij miz haujlai canghbuenq daeuj ndaw mbanj gai gijgwn caeuq gai vanzgi, gij cienz- lokmaj lwgnyez cungj deng cang haeuj ndaw daeh canghbuenq bae lo.

Gvaq ndwencieng cibngux le, aencieng couh gvaq sat lo, gij ndei- gwn gwnz daiz, cungj cang ndaw dungx dou bae lo. Gij feihdauh vansubsub haenx gaeuq dou vuen- yungz baenz bi lo!

(bouxlauxsae son’gyauq Cinz Cinhdonz)

（指导老师：覃珍团）

Gvaqcieng