Ngoenzneix, nditrongh raeujrub, duzroeg youq gwnz faex ciengqgo, dou sim’angq raixcaix, aenvih dou haj nienzgaep 6 aen ban yaek guh ciengz bengcag doxdax gig mizyinx ndeu.

Dou daj gyausiz roengzdaeuj, byaij coh cauhcangz, bouxboux nu fwngz dik din, gip dwk sikhaek doxdax. Miz mbangj angqvauvau dox- got youq itheij, miz mbangj humx guhdoih caez ok geiqmaeuz, doxyaeng baenzlawz hingz ndaej engq vaiq, miz mbangj youq henz guh ndei cunjbei. Geizcaij youq henz cauhcangz mbin- fafa, lumjbaenz hix vih ciengz bengcag doxdax neix gyayouz ne!

“Be——” Sing sauq baez yiengj, dou haj it ban caeuq haj ngeih ban doxdax lo. Dou haenqrengz beng dauqlaeng, hoeng, baengzhoengz cungqgyang lij dwg mbouj doengh saek di. Sawqmwh, doiqfueng baez okrengz, dou deng beng baenaj, ceng di couh laemx baenaj lo. Song mbiengj lahlahdui sing hung hemq “ban haj it gyayouz”, “ban haj ngeih gyayouz”…… Sing hemq neix lumj- baenz hawj ndang dou guenq cungj ligliengh ndeu. Dou ok daengx ndang rengz, buekmingh beng doxma. Diuz- cag yaengyaeng gaen dou gvaqdaeuj di ndeu lo, daihgya mbe bak haeb heuj, fajnaj yakyawj raixcaix. Yienghceij Lij Gyahloz ceiq mizyinx, de laep song da, najbyak nyaeuq ok sam diuz sienq, haeb faenz haeb heuj, gij yienghceij neix lumjbaenz in ndaej yaek dai mbouj lix. Dou bouxboux cungj buek- mingh lo, hoeng, doeklaeng lij dwg saw lo.

Ciengz daihngeih dwg fuzhozsai, dou miz ginghniemh lo, daihgya gaem maenh diuzcag, song din capmax, gungj hwet buenq nyaeu ndang. Aensauq baez yiengj, dou caeuq doiqfueng cungj haenqrengz beng, doiqfueng fwt fatrengz, gou youq gwnz dieg gyod mbat ndeu, baengzhoengz deng beng gvaqbae lo, 1 mij! 90 lizmij! 50 lizmij! 30 lizmij……Yaek saw lo, gyoengq bouxyawj sing hemq gyayouz daenh ndaej rwz nuk bae, dou daengx ban doengzhag sim cungj diuq daengz henz hoz lo. Gou rengz gwn cij cungj ok liux lo, haiz hix ngad mbongq congh lo. Canh Dwngzfeih youq baihnaj gou, fajnaj de hoengzfoed- foed, de hemqnga’nga, sing hemq lumj gaj mou mbouj dai ityiengh. Couh youq seizde, doiqfueng hix ok rengz sat lo, dou swnh gyoengqde miz di cuengqsoeng, caez ok rengz, yaep ndeu couh beng dauqma haujlai, dou laebdaeb fatrengz, ye! Dou hingz lo! Daihgya angq dwk diuq hwnjdaeuj.

Yienznaeuz baez doxdax neix ban dou cij ndaej daihseiq mingz, hoeng, dou caenhrengz lo. Gou sim siengj, baizmingz gonqlaeng mbouj youqgaenj, youqgaenj dwg dou gaenq caenhrengz lo.

(lauxsae son’gyauq Cuh Veimingz)