Gou dwg lwgmbauq dwggyaez Bouxcuengh, gou ciengzseiz cam:“Daxboh, mwngz gangj cingz Mbanj- cuengh dwg gijmaz ne?” Daxboh riunyumj doiq gou naeuz: “Mwngz gag bae ra ha！”

Nanzdauh cingz Mbanjcuengh ndoj youq ndaw laeujvan haeux- naengj？Geiqndaej bineix “sam nyied sam”, gou miz faenh youq bakdou hagdangz —— Mungzgungh Minzcuz Cunghyoz eu fwen ciep hek. A! Cingz Mbanjcuengh youq gizneix dahraix! Ngoenzde dou daenj hwnj buhvaq Bouxcuengh hoengzhoengz loegloeg, gyaeundei dangqmaz. Dou baiz baenz song doih, ndwn youq song mbiengj bakdou hagdangz, angq eu fwen Bouxcuengh ciep bouxhek. Bouxhek baenz bang baenz gyoengq daj gizgyae daeuj, singgo dou rwenzrwd: “Beix ya nuengx vei, muengh bae muengh dauq daengz dou ranz le, gingq hek sam vanj laeuj haeuxnaengj, fwen swnh laeuj hom sing goksa, beixnuengh vei, cingzngeih naekna gingq ya gingq dangqnaj.” Cingz Mbanjcuengh daeuj lo! Aenvanj beij aennaj dou lij hung haenx, cungj daek rim laeuj, dou song fwngz gingq hawj bouxhek, bouxhek song fwngz ciep vanjlaeuj, gaemz hung ndoet roengz dungx bae. Cingz Mbanjcuengh daj ndaw laeuj hom rih okdaeuj, daj ndaw yiedcingz vunz Bouxcuengh ndonj okdaeuj lo！

Bouxhek gwn laeuj gvaq le, couh bae yawj diuq fouxfaexsaux. Gwnz cauhcangz vunz lai vunz daih, song diuz faexsaux doxbungq seiz fat ok sing yiengjdoekdoek, bouxdiuq swnh faexsaux hai hab diuq haeuj diuq ok, gyoengqde angqvauvau guh gak cungj dungcoz, bouxhek youq henz yawj ndaej din fwngz humzsisi. Boux mbeihung yamq ok yamq daih’it, gyoengqde yien fwngz hagseng, hag- seng son gyoengqde riengz sing faexsaux “hai hai hab hab, hai hai hab” yamq haeuj diuq ok, bouxhek diuq ndaej geijlai yinxdaeuz ha! Gij hek siengj diuq youh lau geb din haenx, doeklaeng nyaenx mbouj ndaej hix mbeihung diuq hwnjdaeuj lo. Yawj, cingz Bouxcuengh mbouj dwg youq ndaw sing riu angqyangz diuq fouxfaexsaux haenx ha?

Gangj sat cingz Mbanjcuengh “sam nyied sam”, caiq daeuj gangj- gangj “ciet makmoed” ranzmbanj dou ba! Moix bi liggaeuq loeg nyied co- ngeih ngoenz haenx, daengx mbanj nauhnauh yiedyied. Haetcaeux, ranz- ranz gaj bit gaj gaeq, bit gaeq dumq cug le, rap bae caeqbaiq, cuengq bauq yiengj mbouj dingz. Ndaw mbanj lauxlaux cozcoz, bouxboux cungj nyaengq guhhong. Lwgnyez bae mbaet makmoed, baenz foengq baenz foengq makmoed youh hung youh henj venj youq gwnz ngafaex, naekgywg duengh doxroengz, gwn haeuj bak bae, youh van youh diemz; daxmeh caeuq mehsimj swiq byaek baij daiz, miz gangj miz riu; daxboh daxau ronq noh yiengjdukduk; daxbuz bau ceiz, daxgoeng caq, aen ceiz caq ndei de henjrwgrwg, youh rang youh byoiq. Daxboh umj biengx laeuj makmoed de okdaeuj, baez hai fabiengx, feih makmoed swnhhom ndonj haeuj ndaeng vunz bae, caen hawj vunz caengz gwn couh fiz lo! Bouxhek laebdaeb daeuj daengz lo, ndawmbanj nauhyied hwnjdaeuj lo, gijgwn ndei- gwn baij rim daiz, bouxsai itmienh gwn laeuj itmienh caimax, sing hemq coenz beij coenz sang, mehmbwk itmienh gwn itmienh gangjgoj, seiz mbouj seiz riuhaha, lwgnyez mbouj ndeindei naengh daiz, cix dwg angq- vauvau buet bae buet dauq. Daengx mbanj cungj deng heiqrang makmoed caeuq sing angqyangz humxdawz lo. Seizneix, cingz Mbanjcuengh hix okdaeuj lo, gyaux youq ndaw feihrang makmoed caeuq sing angqyangz.

Gou ra raen cingz Mbanjcuengh lo, youq ndaw vanjlaeuj, youq ndaw fouxfaexsaux, youq ndaw gijgwn ndei- gwn, youq ndaw vah gangjriu……

(boux lauxsae son’gyauq Vangz Fungli)