“Ngoenzneix gou lai dawz faenh ndeu ne!”

“Cang hawj gou?”

“Laihdai, nanzdauh dwg hawj duz ma iq gwn?”

“Mwngz baenzlawz rox ngoenz- neix gou yaek daeuj moq?” Ndawsim Lungz Byauh ndatfwdfwd, cigsoh cim- yawj Siu Cuh, “Danghnaeuz ngoenz- neix gou mbouj daeuj ne?”

“Dawz baema gueng duz mou- lwg.”

“Gaej gwq baeh gou.”

“Mwngz gwn mbouj gwn ha?”

“Gawqyienz mwngz daiq daeuj yaek hawj gou gwn.” De angqvauvau naeuz, “Yienghneix, mwngz gwn gonq ba, lw roengzdaeuj caiq hawj gou gwn.”

“Wnggai aeu bouxhek gwn gonq lo.” Siu Cuh youh ndenq aen doengj- faex gvaqdaeuj.

“Mbouj, wnggai dwg bouxcawj gwn gonq.”

Siu Cuh cuengq doengjfaex iq youq gwnznamh, ndiengq bak, gyaj- cang hozhwnj.

“Ndei, ndei.” Lungz Byauh euq mbouj gvaq Siu Cuh, cij ndaej dingq gij vah de, iet fwngz dawz doengjfaex iq hwnjdaeuj, riu naeuz, “Caen doiq mbouj hwnj lo, yaep he hawj mwngz gwn haeux lw.”

“Faj fwngz mwngz aenvih gou deng hwnj bop lo, gou cij doiq mbouj hwnj ha——” Gemj Siu Cuh sawq- mwh hoengzmaeq, youh gangj daengz gijwnq, “Byawz hawj mwngz ngoenz- neix mbouj daiq lwgmaenz daeuj? Gou cungj mbouj ndaej hawj mwngz ndaw dungx hoengqvat bang gou gvej haz ba.”

Lungz Byauh gaenq ndoet le geij gaemz caz, de hix hozhawq dungx iek dahraix lo, aen ceiz cien ndaej henjrwgrwg nyaij youq ndaw bak homfwdfwd bae.

“Ngoenzlwenz couhdwg aen lwgmaenz doek roengzdaeuj cij hwk deng mwngz, seizneix gou baez ngeix hwnj lwgmaenz couh simnyap!”

(caengz sat)