Ngoenzcog yaek miz ndit lwi? Dah’enq yienghneix naemj, ngonz baihrog conghcueng ranzbingh. Mbwn laep miz fwnmoenq, daengrongh ciuq roenloh, yawjraen vunz youq gwnz gai hix lai hwnjdaeuj lo.

Mbangj vunz ngaem gyaeuj buet dauqma, mbangj vunz ra dieg daeuj baijdan. Hix miz 2 bouxcoz guhdoih gang liengj, daegmbauq got dahsau gangj gij saeh mizyinx, dahsau daenj vunjraez hau, ngaem gyaeuj caegcaeg loh ok najriu caemhcaiq naj nding, caez byaij youq diuz gai henz yihyen.

Rumzliengz baihrog riengz cueng ci haeujdaeuj, ci hwnj byoemgyaeuj Dah’enq, de siengj: Baihrog caen ndei, couh lumj gaxgonq nei. Ngonz song bouxcoz haenx doxgangj doxriu, yied byaij yied doxgyawj doxnem, ndawsim de caem roengz youh fouz hwnj, saehgonq hix lumj nda youq baihnaj nei.

Mbouj geij nanz, coenz vah “Dahnuengx” lumj fwnmoenq ndik roengz, najraemx dingh deng dwk bienq ndaej fubfed nei, dwkduenh le gij ngeixdauq Dah’enq. Dwg boux dahbingh henz mbonq ranzbingh heuh, ngoenzneix ngamq haeuj rug ranz- bingh neix. De ninz youq gwnz mbonq, raen Dah’enq byoemgyaeuj deng rumzliengz ci hwnj lij moenghmangh yawj coh baihrog, couh gvansim cam:“Dahnuengx, mwngz ndwn youq henz cueng guh maz, baenzlawz lo? Rumz- liengz ci lo, aeu haeujsim ndang gaeq bw!”

“Mbouj baenzlawz, couhdwg, haxbaenh, gou siengj yawjyawj baih- rog.” Dah’enq ngauzngauz gyaeuj, menhmenh han naeuz.

“Dwg siengj bingh ndei okyen, roxnaeuz siengj byawz lo?”

Dah’enq bakmwt le yaep ndeu, cij dap:“Wnggai dwg siengj vunz luba, de aiq mbouj daeuj yawj gou.”

“Doiq mbouj gvaq, dahnuengx, gou yawj mwngz vunz coz gyaeundei, aiq mwngz miz daegyoux, caj de roengzban daeuj yawj mwngz ne.” Bouxmbwk neix lau gangj vah loek, saeknaj hix bienq ndaej yiemzsuk hwnjdaeuj.

“Mbouj miz maz, dahcej, gaej you gou.” Gaenq gig nanz mbouj miz vunz caeuq Dah’enq gangjgoj lo, de gejnaeuz, “Gou couhdwg caeuq de doxbiek lo, hix mbouj miz saeh giz- yawz. Geij ndwen gonq, gou fat bingh youq yihyen, hix dwg youq rug ranzbingh neix, aen mbonq henz cueng neix. Geizgonq, de ndaejhoengq mboujlwnh rumzhaenq fwnraq cungj daeuj yawj gou. Miz baez he, hix dwg youq aen dienheiq mbwn laep rumzliengz yienghneix, de rox gou gyaez gwn doxgaiq van, cienmonz cam gvaq canghyw le, vih gou guh le gij raemxdang van he. Hai denceh vaiqvava, hai le geij goengleix, soengq daengz ndaw fwngz gou seiz, lij raeujrubrub……” Naj Dah’enq gangj dwk gangj dwk menhmenh miz di riunyumj lo, youh doq mbouj riu lo.

Bouxmbwk laebdaeb cam:“Doek- laeng de vihmaz mbouj daeuj lo?”

Dah’enq ciep gangj:“Aiq dwg aenvih bingh gou mbouj yungzheih yw ndei, buenq bi lo, de vih gou guh le baenzneix lai, hix miz saekdi baeg lo……”

“Mwngz ha, hix gaej doeknaiq lai. Mbwn mbouj cungj dwg itcig yienghneix laep yienghneix liengz, hix miz mwh fwn gvaq ndit ok raen saidoengz. Lumj gou, aenvih baenz- bingh haeuj yihyen gaenq miz haujlai baez lo, youq ranzbingh seiz, bouxgvan gou muengz lai, youh aeu ciuqgoq lwgnyez, lwgnyez aeu bae hwnjdangz, mbouj miz vunz buenx gou, gou vihmaz aeu siengsim ne? Gyoengqde miz saeh muengz, mwngz couh aeu gag ra angq guhcaemz. Daengzcog nanz rox, aeu miz maqmuengh, doeklaeng mwngz ndaej bungqraen bouxsai engq ndei ne? Miz maz saeh nyap, ndaej caeuq gou gangjgangj, raeuz caez youq rug ndeu, dwg yienzfaenh.”

Bouxmbwk neix daengx yaep he, daj gwnz daengz laj cimyawj Dah’enq, riu naeuz:“Dahnuengx, caj gou bang mwngz gaisau bouxsai ndei ndeu, aeu lwi?”

Dah’enq dingq le vahnai, sim- luenh ndaej caem, gig gyo’mbaiq boux mehmbwk neix, hoeng diuz giemxdou ndawsim de caengz yamq gvaq, riu naeuz:“Docih lo, dahcej, gienh saeh neix couh mbouj mazfanz mwngz lo.”

Rumzliengz engq haenq daj rog ci daeuj, byoem mehmbwk neix hix deng ci hwnj, Dah’enq doq bae gven cueng doq naeuz:“Doiq mbouj gvaq, gou doq gven cueng, dahcej, mwngz dwgliengz lwi?”

“Mbouj miz maz, ndang gou gig ndei, daeuj gizneix lai baez lo, doeklaeng cungj dwg mbouj geij nanz couh ndaej okyen!” Boux mehmbwk neix riu han.

Haemh de, aiq dwg aenvih dingq le vahnai mehmbwk haenx, Dah’enq ninz ndaej beij bingzseiz engq ndei, lij guh aen loq ndei dem. Hoeng, aen sing heuh cauz hawj de daj ndaw loq ndei ndiu gvaqdaeuj lo.

Yienzlaiz dwg boux mehmbwk neix diemheiq ajngaebngaeb, cingq deng boux husw he yawjraen, boux husw heuh vunz daeuj bangfwngz. Dah’enq hix mbouj rox miz saeh maz, gaenq deng gyoengq husw lienz vunz daiq mbonq doi ok ranzbingh bae, vih ciengjgouq boux mehmbwk haenx doenq dieg. Youq rog ranzbingh, Dah- enq ninz youq gwnz mbonq cang guh caengz ndiu, hoeng ndaejnyi gij sing cauz ndaw ranzbingh, ndawsim mbouj ndaej an’onj.

Gvaq caenh ndeu, bouxsai he daiq boux lwgnyez he daeuj daengz rog ranzbingh neix, gij sing cauz baihndaw cix menhmenh dingz roengzdaeuj lo.

Dah’enq deng anbaiz daengz ranzbingh wnq. Yienznaeuz dingq vah canghyw gangj mbouj gven saeh haemhlwenz hai cueng ci rumz, ndawsim cungj dwg miz saek lumj deng rumzliengz ci gvaq nei in.

Boux dahcej haenx gaenq bae lo. Dah’enq ngonz coh rog cueng ranzbingh moq, fwn gvaq mbwn gvengq, gwnz gai vunz bae vunz dauq, ndit ciuq daengz gwnz mbonq Dah- enq, de roxnyinh raeujrubrub, dauq- ngeix gij vah dahcej, ndawsim naemj: Dahcej de nai gou aeu ndeindei gvaqngoenz, aeu yawj laeng, seizneix de gaenq bae lo, gou aeu dingqgangj, menhmenh gvaq ndei moix ngoenz. Dah’enq youh yawjyawj ndaw ranz- bingh, saenqsim swkswk deq gij ngoenz ndit engq ndei engq haenq.