Bi 2020 ndwencieng, gvaq cieng feihdauh damh lai lo, hoeng gij gyaez cix lumj feiz ityiengh raeujrubrub. Binghraq bwtndat lah daengx guek gak dieg, dou mbouj vueng mbouj luenh, mbouj saenq vahgyaj, mbouj caux vahgyaj, hix mbouj cienz vahgyaj. Lauxlaux saedsaed youq ranz, neix hix suenq dwg vih guekgya guh di saeh ndeu.

Daxmeh nyinhcaen son dou swiq fwngz, daxboh hix youq henz nam:“Song fajfwngz doxnu, lwgfwngz gyauca nu, laengfwngz fanfoek nu, hohfwngz sijsaeq nu, lai dongj geij baez raemx.” Lienz daegnuengx ngamq song bi haenx hix rox, moix baez guhcaemz vanzgi le couh bae swiq fwngz ne! “Bingh gojyij re ndaej fuengz ndaej, mbouj fuengz mbouj re couh mbouj ndaej, aeu dawz diuz- mingh caeuq ndangcangq moix boux vunz cuengq youq daih’it!” Daxboh youq ranz gangjvah ceiq miz faenh- liengh.

Ndwencieng cosam, daxboh ciep daengz doengci bae Daihhaw cigban. Daxmeh mbouj lijgaij cam:“Mbouj dwg cuengqgyaj daengz ndwencieng cocaet ma?” “Neix couhdwg hong gou, neix couhdwg minghlingh!” Daxboh ciengj vah daxmeh gangj. Daxmeh yaengyaeng bang daxboh gip buhvaq、faengx、maenz、namzgva…… Yaek okdou seiz, daxmeh youh fung aen hoengzbau daihgit daihleih hawj daxboh, daengq de gwnz loh aeu siujsim……

Ndwencieng cobet, daxmeh yaek bae haw cawx yw. De mbouj miz aengoemqbak canghyw yungh haenx, couh daiq song caengz aengoemqbak baengz, daenj mauh ndei okdou lo. Dauqma seiz, sien youq rog duet buhvaq baihrog, youq rog swiq fwngz, feiz coemh aengoemqbak. Youq rog saeg buhvaq baihrog dak youq laj gofaex ndaw suen. Daxmeh lij ngoenz- ngoenz bang gou caeuq daegnuengx rau ndangraeuj, fuengz ndangndat.

Ndwencieng cogouj, haetcaeux, daxmeh simvueng saenzdwddwd naeuz:“Dahlwg, Daihhaw miz bingh- laeh binghraq bwtndat lo!……” Gou cij dwg got maenh daxmeh mbouj guh sing, daxmeh dwk song baez dienhvah hawj daxboh, cungj mbouj miz vunz ciep, daxmeh lawq lo, ngaezngwd ndwn dwk, daegnuengx daej yaek gwn faengx cungj mbouj leixlangh. Banngaiz, dauqdaej dwk doeng dienh- vah daxboh lo, daxboh cij gangj coenz vah ndeu: “Gou caengz ndaej baema! Gou yaek caeuq vunz Daihhaw guh- doih!”Daxmeh dingqnyi sing dax- boh, soeng gaemz heiq ndeu, gag gangj gag naeuz:“Mbouj dwg dandan you- heiq ndangdaej de, lij lau de hoj guhhong dem.” Daxmeh ciemhciemh caem roengzdaeuj, sing’unq naeuz: “Daihhaw miz binghraq bwtndat lo, sou ceiq noix ndwen ndeu mbouj ndaej raen naj daxboh lo!” Gangj sat, daxmeh sawqmwh giengiengz hwnj- daeuj, riu naeuz: “Mbouj lau, lwggvai, sou miz daxmeh ne!”

Gou gingqboiq Cungh Nanzsanh laux sienseng, gingqboiq cansw buh- hau youq yihyen nyaengq guhhong, gingqboiq moix boux vunz vih hoenx hingz binghraq nyaengq guhhong! Youq aen cieng mbouj bingzciengz neix, yienznaeuz mbwn nit, hoeng ndawsim cix raeujrubrub.

(boux lauxsae son’gyauq Leiz Fwnhlinz)