Seizgan lumj naq, yaepda couh gvaq ngeihcib bi, gou ndawsim gikdoengh raixcaix, maqmuengh vaiq di ma daengz ranzmbanj——Mbanj Yinghngoz.

Byaij daengz bak mbanj, o, neix lij dwg aen mbanj iq hojndoq haenx lwi? Gizneix caen lumj diendangz ityiengh.

Yawj, gizneix gofaex hungloet sangvid, mbawfaex mwncupcup, gwnz gofaex duzroeg ciengqgo cici caca, ndeidingq raixcaix, baihlaj gofaex dwg suenva gyaeundei, va hai homfwd, mbungqmbaj mbin hwnj mbin roengz, miz geij laeq lwgnyez dwggyaez youq gizneix caeuq mbungqmbaj guhcaemz, angq ndaej riugekgek mbouj dingz.

Yi, geizgvaiq lo, baihnaj miz geij diuz loh gvangqlangh sohswd, hoeng cungj mbouj raen saek gyaq heiqci, gij heiqci cungj bae gizlawz lone? Gou ndwn youq gizneix yawj le haujlai nanz, laxlawz heiqci cingq youq gwnzmbwn mbin ne, heiqci cungj dwg yungh hoengheiq daeuj fatdoengh, mbouj miz saekdi uqlah, gwnz loh caiq hix mbouj miz ci saek, hix mbouj miz ci doxbungq oksaeh, gyoengqvunz youq gwnz loh byaij gig cuengqsim.

Baihde miz doengh laeuz sangvid ndeu, daihgaiq miz 1000 caengz, gwnz laeuz sang sij miz geij cih saw hung——Yinghngoz Yozyau. Byaij bae coh hagdangz, youq henz bakdou mbouj raen miz bouxhendou, gou ndwn le yaep he, cijraen gwnz bakdou“di”sing ndeu, yienh’ok mbawsiengq gou, baihlaj lij miz genjgai gou, sawqmwh gwnz bakdou cienz daeuj sing:“Cinz Sinhyingj, angqcoux mwngz dauqma hagdangz.” Bakdou fwt hai lo, gou menhmenh byaij haeujbae. Mwngz aiq roxnyinh daengz geizgvaiq, doenghlaeuz baenz cien caengz, bae daengz dingj laeuz dwg mbouj dwg aeu buenq ngoenz cij daengz? Mbouj yungh yousim, siengj bae caengz lawz cij aeu naenx aenhaigven, miux cung ndeu couh daengz lo. Dienhdae hwnj- roengz mbouj yungh dienh, cungj dwg yungh gij heiqfeiq daeuj fatdienh, ndigah gizneix hoengheiq daegbied singjsien. Ndaw gyausiz, gwnz daiz mbouj miz saek bonj saw, cij raen bangx daiz miz aenhaigven hoengzfwt ndeu, naenx aenhaigven neix, dienz haeuj mizmaj, senj aeu bonjsaw, senj ndei daezmoeg, couj ndaej yawj lauxsae hwnjdangz lo. Aen hagdangz neix daj youwzyenz daengz dayoz cungj miz, daihgya gag guh gij saeh swhgeij cungj mbouj dox gauxca. Roengzdangz lo, gyoengq doengzhag byaij ok gyausiz, bae guhcaemz youzhi mizyinx de, gyoengqde geijlai angq- yangz ha!

Byaij ok hagdangz, gou bae yawjyawj gij gwndaenj ndaw mbanj, gyoengqvunz cungj youq aenranz lumj feihgih nei, gyaq“feihgih” ndaej mbin bae mbin dauq, danghnaeuz fatseng caihaih, “feihgih ”couh mbin bae giz dieg ancienz. Byaij haeuj ndaw ranz, cungj mbouj raen miz daiz、daengq、dieg dajcawj…… Gwnz bangxciengz miz haujlai haigven, cijaeu naenx aenhaigven, senj aeu mwngz siengj aeu siengj guh haenx, gijde couh okdaeuj. Moix ngoenz haetromh hwnq- mbonq, vunzgihgi couh rox daeuj bang mwngz rau ndangraeuj, lwnh mwngz yaek daenj gijmaz buhvaq, yaek gwn gijmaz doxgaiq……Mwngz aiq yienghneix cam:“Gij hong neix miz vunzgihgi bang guh lo, gyoengq- vunz cungj bae guh gijmaz ne?”Gyoengqvunz ndaej bae lienh ndangdaej, ndaej yawj saw, mwngz siengj guh gijmaz couh guh gijmaz. Gij saedceij yienghneix cwxcaih lai lo.

Neix couhdwg ranzmbanj baez- laeng gou, vihliux saedyienh aen loqsiengj neix, daj neix hwnj gou aeu roengzrengz hagsib.

(lauxsae son’gyauq Lij Liginh)