Bonjbauq siusik（gicej Dangz Lungz）Geij ngoenz gonq, Gvangjsih Yinzminz Cuzbanjse、Gvangjsih Minz- cuz Cuzbanjse doxgap oksaw fathengz bonj《Gojgaeq Vah Saw Minzcuz》youz bause dou bienraiz de.

Bonj saw neix aeu gij baudau baenzroix《Gojgaeq Vah Saw Minzcuz》guh goek ginggvaq bienhoiz cij baenz, gij baudau baenzroix neix dwg bause dou vihliux geiqniemh 《Fangh’An Sawcuengh》fatbouh 60 hopbi cix doiok; de aeu Sawcuengh、Sawgun doxdoiqciuq gangj 38 aen gojgaeq vah saw minzcuz.“Oksaw bonj《Gojgaeq Vah Saw Minzcuz》neix, aeu Vah- cuengh Vahgun gangj gojgaeq Boux- cuengh, dijcienz lailai. De hawj vunz- lai cingcuj vunz Bouxcuengh naemj aeu hagsib、sawjyungh、cienzboq Vahcuengh Sawcuengh, caemhseiz langhbaij Guengjsae minzcuz doxgiet、lai cungj vah doxndei caemh youq vanzlij vunz Bouxcuengh gyaez guek, caiqlij caen ndaej senhconz gij cwngcwz vah saw minzcuz dangj caeuq guekgya.” Boux dang gvaq Cunghyangh Minzcuz Dayoz fuyau- cangj de Liengz Dingzvang youq mwh raiz gij vahbaihnaj bonj saw neix baenzneix naeuz.

38 aen gojgaeq gangj le 38 bouxvunz caen miz、hawj vunz sim raeuj、dijndaej raeuz youh gingq youh gyaez. Gyoengqde mizdi gag roengz- rengz hag Sawcuengh, bienqbaenz boux cienzboq Vahcuengh Sawcuengh, baenz ciuhvunz cungj haenqrengz haiuk guh gij saeh neix; mizdi vunz banngoenz nyaengq ra cienz ra gwn, banhaemh angq hag Sawcuengh, Vahcuengh Sawcuengh mbouj hawj de ndaej saek faen ngaenz, hoeng de yawj Vahcuengh Sawcuengh dijbauj baenz- maz bae; mizdi vunz haenq sing heuh vunzlai hawj Vahcuengh Sawcuengh hwngfat; mizdi vunz ngoemxngoemx ok rengz guh hongsaeh Vahcuengh Sawcuengh; mizdi vunz banh banson- lienh Sawcuengh hawj vunzlai ndaej- leih; mizdi vunz youq gwnz vangjloz hai dendaiz; mizdi vunz youq gwnz gvangjcangz gyaeuj haw hamj daihhaij de eu Fwencuengh. Gyoengqde guh neix guh de, dang neix dang de, gag ok gak cungj banhfap ciepcienz doigvangq Vahcuengh Sawcuengh; aeu sawcih、singyaem、ingjsiengq cienzbo doigvangq Vahcuengh Sawcuengh; aeu cozbinj Vahcuengh swnj mingh Vahcuengh Sawcuengh; baengh eu fwen、raiz faenzcieng, geiq ndei、ciepcienz、doigvangq gij vwnzva maenhndei Bouxcuengh.