Baezneix hawj Lungz Byauh ndaej gvaqyinx lo, Siu Cuh daeg- daengq mbouj lanz de, yawj de dauq- daej dwg caensim roxnaeuz gyajeiq daeuj bang bonjfaenh, daengz doek- laeng Lungz Byauh baeg ndaej yaek diemheiq mbouj ndaej, song gen nanqgaux, fajfwngz hwnj bop, gwnz ndang hanh dumz, hoeng lij caengz ndaejnyi gij sing Siu Cuh heuh de daengx. Youh mbouj ndei swhgeij gag daengx roengz yietnaiq, cij ndaej haeb heuj auqmanz laebdaeb gvej.

“Siu Cuh ha——”

Gwnz bya baihde yiengj gij sing heuh he, youq ndaw lueg gongz haenq.

“W——” Siu Cuh sing gok- sadsad dap sing ndeu.

“Daengx roengzdaeuj gwn haeux caengz?”

“Cingq yaek daengx ne!”

“Gou hix yietnaiq luba——”

“Raeuz itheij daengx ba——!”

Geij boux dahsau doengz mbanj neix, miz boux hainduj hemq, caezgya cungj oksing, youq ndaw lueg baihneix cam baihhaenx han, gij sing youq ndaw lueg gongzgyanggyang caemh- caiq raezrangrang, fwt nauhyied hwnj- daeuj lo.

Siu Cuh byaij daengz baihlaeng Lungz Byauh, sing iq naeuz:

“Vei, dou daengx lo!”

“Haxbaenh boux daih’it heuh mwngz dwg byawz?” Lungz Byauh cuengq fagcax roengzdaeuj, nyaenx fwngz nanq, riumbw cam, “Dwg mbouj dwg Dahyi?”

“Mbouj dwg, dwg Danh Fung.” Siu Cuh byaengq hung lwgda, “Baenzlawz? Mwngz siengj roxnaj de?”

“Mbouj, gou aeu gyo’mbaiq de.”

“Ha?”

“De gouq gou lo!”

Siu Cuh rox gij eiqsei Lungz Byauh, ndiengq bak riu hwnjdaeuj.

“Hix aeu hawj boux vunz mwngz gwn di hoj cij ndaej, mboujnex haibak haepbak cungj naeuz bangfwngz. Baenzlawz yiengh? Ngoenzcog mwngz mbouj gamj daeuj luba?”

(caengz sat)