Sai:

Rog canz dak buhmoq,

Lajroq couh dak mae,

Gou siengj yamq haeujbae,

Lau vunz daez(dawz) bakdou.

Mbwk:

Buhmoq dak rog canz,

Douranz fouz vunz daez(dawz),

Beix yamq hwnj mbaeklae,

Couh ndaej yamq haeuj ranz.

Sai:

Gou yaek yamq haeujbae,

Mbaeklae nuengx caen sang,

Gou yaek caeuq nuengx gangj,

Gyadangq gou mbouj lai.

Mbwk:

Beix mwngz siengj gizlaez(lawz),

Daengz lajlae mbouj yamq,

Rox beix sim mbouj ngamq,

Cingq mbouj yamq hwnj ranz.

Sai:

Gou caemh siengj haeujbae,

Gyadaej gou caen hoj,

Fouz duzgaeq gaen noh,

Doiq boh mwngz mbouj gvaq.

Mbwk:

Seizneix seizdaih moq,

Boh gou hix mbouj caz,

Caen mbouj miz huq maz,

Daeuj gangjvah hix baenz.

Sai:

Gou caemh siengj haeujbae,

Gyadaej gou caen gyanq(hoj),

Aeu maz ndenq hawj lan,

Haeuj ranz nuengx saetnaj.

Mbwk:

Bouxlan vanzlij iq,

Lij gwn cij gax beix,

Caiq gvaq bi song bei(bi),

Cawx daeuj hix ndaej baenz.

Sai:

Gou caemh siengj haeujbae,

Gyadaej gou mbouj na,

Raen bohlungz mehbaj,

Aeu maz ndenq hawj vunz?

Mbwk:

Beix mwngz siengj gizwnq,

Mbouj hwnj ranz daeuj youq,

Sim siengj boux dem boux,

Youq sij hwnj ranz gou.

Sai:

Dangh nuengx baenzneix naeuz,

Beix couh daeuj dahraix,

Daengq nuengx doq dawz baij,

Ndingq laeuj daih daegbeix.