Faenh cazci《Giuzsi》bineix geiz daih’it youq 1 nyied 1 hauh okbanj, ndawde fat miz bien faenzcieng《Guhdoih Cauhlaeb Aen Minghyinh Caezcaemh Vunzloih》youz Cunghgung Cunghyangh cungjsuhgi、Gozgyah cujsiz、 Cunghyangh Ginhveij cujsiz Siz Ginbingz 2017 nienz 1 nyied 18 hauh youq Lenzhozgoz Yizneivaj Cungjbu yienjgangj gvaq de.

Faenzcieng lai dawznaek naeuz, vunzloih cingq youq duenh daih hwngfat daih bienqvaq daih gaijbienq, hix youq aen seizdaih hojnanz miz liux miz dem、fungyiemj ngoenz beij ngoenz lai. Aen seiqgyaiq neix baenzlawz gvaq、raeuz aeu baenzlawz guh? Cungguek ok banhfap: Cauhlaeb aen minghyinh caezcaemh vunzloih, ndaej caez hingz caemh yungh.

Faenzcieng vixok, cauhlaeb aen minghyinh caezcaemh vunzloih, caen guh caen hengz ceiq youqgaenj. Dingjmaenh doxlwnh doxyaengh、caez guh caemh yungh、doxgap caez hingz、doxgyau doxhag、noix uq noix lah, cauhlaeb aen seiqgyaiq bingzonj nanznaih、dauqcawq ancienz、guhdoih mwnhoengh、hailangh bauyungz、seuqcingh gyaeundei.

Faenzcieng vixok, seiqgyaiq ndei, Cungguek cij ndei; Cungguek ndei, seiqgyaiq cij lai ndei. Dajsuenq coglaeng, daih’it, Cungguek laemxsim henhoh seiqgyaiq bingzonj cungj mbouj bienq, daihngeih, Cungguek laemxsim doinyoengx guhdoih hwngfat cungj mbouj bienq, daihsam, Cung- guek laemxsim cauhlaeb gvanhaeh gapdoih cungj mbouj bienq, daihseiq, Cungguek laemxsim haeujcoengh dohbenh cujyi cungj mbouj bienq.

Faenzcieng vixok, cauhlaeb aen minghyinh caezcaemh vunzloih dwg aen moegbiu ndeindi ndeu, hix dwg aen moegbiu aeu daih dam daih doxciep haenqrengz guh cij baenz- saeh. Cungguek nyienh caeuq seiq- gyaiq gak guek、gozci cujciz caeuq gihgou duhdoih, doengzcaez doi- nyoengx hongsaeh cauhlaeb aen minghyinh caezcaemh vunzloih de yamq baenaj hungmbwk.

（ciuq Sinhvazse）