Daihcib Aulungzgveiz Gangj Goj (Daihsam)

Baezlaeng, Lungz Byauh couh mbouj baenzneix romh couh hwnqdaeuj bae riengz Siu Cuh lo, de youq ranz gwn haeuxromh imq le, raen daengngoenz gaenq bin hwnjdaeuj, cij caeuq daxmeh de naeuz bonjfaenh yaek hwnj bya bae guhcaemz.

“Lwg, gwq buet ok rog bae guh maz? Mbwn baenzneix ndat.” Daxmeh de sing unq heuh de, cam, “Ngoenzneix aeu mbouj aeu bae yawj dahsau ranz singq Ginh Mbanjdalingj? Ngoenzlwenz Buzsimjsam gangj dah de maj ndaej lumj dujva nei, youh gyaeundei youh guh ndaej hong, dinfwngz gig gaenx……”

“Meh, gou mbouj bae!” Lungz Byauh doq doi lo.

“Mwngz raen dah de gvaq?” Daxmeh de geizheih cam.

“Caengz.”

“Baenzneix vihmaz mbouj nyienh bae ne?”

“Mbanjdalingj miz maz dahsau ndei?”

“Buzsimjsam gangj——”

“Byawz saenq gij vah mehmoiz? Go’nya hix ndaej gangj baenz va.”

“Yienghneix, mwngz dwg gangj……”

“Doeklaeng caiq dwen. Meh, gou yaek okbae yaep ndeu.”

“Ndei ha, dauq caeux di. Miz di saeh lij dwg caeux dajsuenq caeux gietdingh cij baenz.”

“Gou rox.”

Lungz Byauh youh riengjret buet daengz gwnz bo Siu Cuh gvej haz haenx.

Gwnz roen mbouj miz maz gvang, de cigsoh buet coh laj go faex hung ngoenzlwenz bin gvaq haenx. Baezneix de mbouj aeu suksuk siemjsiemj lo, aiq Siu Cuh mbouj mbwq de geijlai, aenvih ngoenzlwenz Siu Cuh bang de cij mbouj deng dahsau wnq fatyienh, ngoenzneix daeuj lij lau maz dem?

Go faex hung baihhaenx, Siu Cuh cingq gungj hwet gvej haz, ngoenzneix de vuenh le geu buh’ou, vaq ndaem raez, byai mengq raez geuj diuz mae- hoengz, ndeiyawj dangqmaz. Lungz Byauh mbouj siengj caiq haep de, daegdaengq ae le sing iq ndeu, Siu Cuh doq cienq ndang, song lwgda caengz de.

“Baenzlawz youh daeuj lo?”

“Daeuj bang mwngz ha.”

“Suenq lo suenq lo!” Siu Cuh ndiengq bak, bwnda nyaeuq naeuz, “Mbouj bang lij ndei, yied bang yied fanz!”

“Baenzlawz lo?” Lungz Byauh simvueng cam, “Gou gvej haz mbouj baenz, cug haz cungj baenz ba?”

“Lij euq dem?” Siu Cuh lumj miz di hozhwnj, vut fagcax youq gwnznamh, dawz mauhdiemx beiz faj naj nding’yanyan, “Ngoenzlwenz mwngz cug le song gwed, saedcaih haih dai vunz ha.”

(caengz sat)