“Longh Yahvaiz” Bouxcuengh youh heuhguh vaizcin diuqfoux, dwg cungj hozdung ndawbiengz ndeu. Youq mwh biujyienj “longh yahvaiz”, gyoengqvunz foux aen gyaeuj vaiz hungloet ndeu, roq laz roq gyong, gyoengq lwgmbauq lwgsau caeuq bouxlaux lwgnyez ndaw mbanj cungj aeu diuq fouxvaizcin, sing sang eu fwen, caemhcaiq dawz gij vujgi ciuhgeq biujyienj, youzbyaij daengx aen mbanj, maqmuengh bimoq fwn rumz cuk、doengh haeux fungsou、saedceij gvaq ndaej onjdupdup. Hozdung sat le, caezgya couh gaj mou gaj yiengz, doxcomz youq giz ndeu gwn ngaiz.

Bouxcuengh dwg aen minzcuz ceiq gonq ndaem haeux ndaw ndoeng. Hoeng seizde gyoengqvunz mbouj rox aeu duzvaiz daeuj dajndaem, cungj dwg hawj mehmbwk daeuj rag cae rauq reihnaz, bi nduj guh daengz bi byai, sinhoj dangqmaz. Gyoengqde couh bae ra Baeuqroxdoh naeuz:“Mwngz youq mwh cauh doxgaiq seiz, doiq mehmbwk dou saedcaih mbouj goengbingz ha! Raeuz seng lwg ganq lwg, lij aeu guh hongranz, youh aeu bae ndaem naz、rap raemx raemj fwnz、doz faiq daemj baengz dem. Gij rengz dou bonjlaiz couh iq, laebdaeb guh roengzbae, ndangdaej dou baenzlawz dingj ndaej ne?”

Baeuqroxdoh dingq le, hix roxnyinh gyoengq mehmbwk dwgrengz sinhoj raixcaix. Baenzlawz guh ne? Mwhneix, Baeuqroxdoh cingqngamj yawjraen gwnz diegnywj rog ndoi miz geij duz vaiz cingq cwxcaih gwn nywj. De da baez doengh, couh caeuq gyoengq mehmbwk naeuz:“Doengh gij vaiz neix dauq gig miz rengz, couh heuh gyoengqde daeuj dingj sou rag cae rauq ba!” Gyoengq mehmbwk dingq le, rimhoz dauqbae lo.

Doeklaeng Baeuqroxdoh couh daeuj daengz gwnz diegnywj caeuq gyoengq duzvaiz naeuz:“Duzvaiz ha duzvaiz, sou baenzngoenz gwq youq gwnz bya gwn nywj ndwi, mbouj guh saekdi hong, baez nanz hix mbwq lai lo. Gou hawj sou bae bang bouxvunz rag cae rauq ba!” Baeuqroxdoh dwg bouxcauh ndawbiengz, gij vah de byawz mbouj dingq? Yienghneix gyoengq vaiz cungj “w” sing he dapwngq lo, gaenriengz Baeuqroxdoh bae daengz ndaw ranz bouxvunz yaek guh hongnaz.

Ngoenz daihngeih, bouxvunz daiq duzvaiz bae ndaw reihnaz, duzvaiz mbouj rox baenzlawz guh, caemhcaiq mbouj rox gij vah bouxvunz, bouxvunz hemq de coh baihdoeng, duzvaiz cix yiengq baihsae. Baenzneix guh baenz buenq ngoenz, cix fan mbouj ndaej saek gaiq namh. Bouxvunz simnyap, couh ndaq duzvaiz naeuz:“Duzvaiz caen dwg duzvaiz! Lienz cae naz rauq naz cungj mbouj rox guh, huk lai lo!” Duzvaiz mbouj fugheiq, doq ngauz gyaeuj doq bi rieng. Mbouj liuh daengz bi rieng bi raemx namh daengz gwnz naj bouxvunz bae. Ndawsim bouxvunz feiz byaeu feiz, couh fad gwnz ndang duzvaiz 3 bien, doq fad doq hut:“Mwngz duzvaiz neix, mbouj rox guh hong, lij mbouj dingqgangj dem.”

Duzvaiz deng fad deng hut le, couh buet bae caeuq Baeuqroxdoh gauq, naeuz gyoengqde caiq hix mbouj nyienh bae bang vunz rag cae rauq lo. Baenzneix Baeuqroxdoh couh naeuz bouxvunz:“Duzvaiz dwg gwn nywj, cix bang sou cae naz cae reih. Gij hong neix dwg hong naek, sou wnggai aeueiq duzvaiz. Hoeng, sou cix doengh mbouj doengh couh aeu bien fad de hut de. Gyoengqde hainduj guh, lij mbouj sug, guh geij ngoenz couh hag rox lo. Sou dawz aen ndaeng duzvaiz byoengq lo, cug hwnj diuz cag ndeu, mwh cae naz cae reih, couh yien diuz cag neix bae dazyinx duzvaiz.” Bouxvunz ciuq gij vah Baeuqroxdoh bae guh, caen dahraix, duzvaiz caeuq bouxvunz boiqhab ndaej gig ndei.

Aenvih duzvaiz rengz hung, aeu de daeuj cae, vunz dajndaem couh soeng le haujlai, caemhcaiq vamiuz youh maj ndaej engq ndei, baenzneix vih docih duzvaiz, gyoengqvunz couh dangq vaiz baenz vunzranz, haeujsim ganq de. Doeklaeng youh dawz vaiz dangguh cungj doxgaiq baiqfug ndawbiengz ndeu, moix bi ndwencieng ngoenz duh duzmax daih’it, couh guh gij hozdung “Longh Yahvaiz” hunghoengh, seiqseiq daihdaih cienz roengzdaeuj.