Lungz Byauh saedcaih baeg lo, de swngzgei roengzbae, ndenq fagcax hawj Siu Cuh, aeu gengoenh uet hanh gwnz naj, hix riu naeuz:

“Ndei ha, hawj gou yawjyawj mwngz baenzlawz gvej.”

Lungz Byauh sai le haujlai goengrengz cij cug ndei song gwed haz, youh cab haeuj song gyaeuj hanzgyaeuq, daengj ndaej onjdangq- dangq, baenzneix cij bongxbongx mbawfaex roz caeuq nga’nye sauj gwnz ndang, ndawsim gig cwxcaih.

Siu Cuh yienznaeuz laebdaeb raemj faexcaz gvej haz, hoeng hix seiz mbouj seiz baenq gyaeuj gvaqdaeuj yawjyawj Lungz Byauh. Lungz Byauh nyinhcaen haenqrengz guhhong, hawj de gig gamjdoengh.

“Mwngz sinhoj lo, seizneix maranz gonq ba, gyo’mbaiq mwngz!” De vad fwngz coh Lungz Byauh.

“Muengz maz?”

“Gyoengqde gangj mbouj dingh rox buet gvaqdaeuj ne!”

“Gou mbouj lau gyoengqde, mwngz dauqfanj lau?”

“Aiya, cungj vunz mwngz—— mbouj dwg lau, cix dwg, cix dwg gyoengqde bak lai vah byangz.” De gip ndaej nyaeuq bwnda caemhcaiq loh daemh din.

“Gou youh mbouj dwg vunz- rwix……”

“Deng, deng, mwngz mbouj dwg vunzrwix.” De doiq Lungz Byauh baenzneix nem de miz di mbwq lo, sing hix loq sang lo, “Mwngz caiq mbouj deuz couh bienqbaenz vunzrwix lo, gou baez swenj, gyoengqde sikhaek couh buet gvaqdaeuj.”

“Caj yaep he dem.” Lungz Byauh siengj youq yaep he dem.

“Dahyi ha——”

Siu Cuh fwt hemq sing he, Lungz Byauh deng hwk baez he, yaek lanz hix mbouj gib lo.

“Ai, ai! Gaej luenh heuh, gou couh deuz!” De lau Siu Cuh hozndat, doq cienq ndang couh byaij deuz, song cik fwngz vad mbouj dingz coh Siu Cuh.

“Maz saeh? Siu Cuh——”

Gwnz bya baihde sikhaek miz vunz han.

Siu Cuh liuq Lungz Byauh baez he, sing iq hat:

“Lij mbouj vaiq deuz?”

“Doq deuz, doq deuz!” Lungz Byauh mbouj gamj caiq youq lo.

“Mwngz gvej ndaej geijlai la?” Gij sing Siu Cuh daj baihlaeng yiengj hwnjdaeuj, de cingq dap gij vah doengzdoih.

“Ngoenzneix ndat lai lo! Dou yietnaiq yaep he ndei lwi——”

“Ndei ha——”

“Lajbyonghngoenz gangj mbouj dingh miz fwn daj baih saebaek daeuj ne——”

“Dou caeux di ma ranz——?”

“……”

Lungz Byauh doq byaij coh laj bya, doq dingq gij sing baihlaeng gyoengq dahsau neix youq gwnz bya mwngz cam coenz gou dap coenz, gij sing gyoengqde youq ndaw lueg gongz dwk, caen mizyinx, gwnz fajnaj hanh rim de yienh’ok gij riunyumj vuenheij.(caengz sat)