Lwnh bae naz bae reih,

Meh hix geiq lwg nyaeq,

Baez cuengq rauq cuengq cae,

Couh sien bae bwnq lwg.

Ciengx lwg iq daengz laux,

Youh haeujhag doegsaw,

Bohmeh raeuz caenh dawz,

Aeu hawj raeuz sim’onj.

Ciengx ndaej gyoengq lwg laux,

Bohmeh caux vuenyungz,

Seiz iq daej doq umj,

Menh lumh menh lox ninz.

Lwglan boiz cingzngeih,

Yienghneix cij baenz ndei,

Mehlwg caez doxgyaez,

Ndei lumj sei gij ngaeux.

Meh bae reih bae naz,

Seiz dauqma hix heih,

Dai roengz haj cik deih,

Fanh seiq mbouj doxraen.

Dwen daengz raemxda langh,

Ndok caeuq namh guhdoih,

Soengq bohmeh hwnj ndoi,

Yiengh lawz boiz cingzngeih?

Meh bae mbanj bae haw,

Ok bakdou bae muengh,

De gvaqseiq roengz congh,

Raeuz couh cienq mbouj raen.

Ngoenz dai couh ngoenz liux,

Doxciuq saeh gonq un,

Guh mehlwg ciuh vunz,

Dai roengz gumz lij geiq.

Ngoenz dai couh ngoenz liux,

Hix nanz biuj simcingz,

Gaenx sauqmoh gingqlingz,

Daeuj boizcingz bohmeh.

Youq doegsaw seizgeiz,

Bohmeh ndei ciuqgoq,

Cawx haiz youh cawx buh,

Cungj cam boh aeu cienz.

Daxmeh caeuq daxbaj,

Ngoenz gawq vah mbouj dingz,

Gwndaenj mbouj caiq ing,

Youh causim aeu bawx.

Bohmeh haemh roengz ninz,

Sim mbouj dingz geiq raeuz,

Lwg baenzsaeh doxaeu,

Youh caeu ngaenz cawx ranz.

Bohmeh lumj diendeih,

Guh lwg ngeix hauqsim,

Niemh bohmeh aencingz,

Roeg mbin rox dauqranz.

Daengq gak boux beixnuengx,

Maqmuengh sou aeu geiq,

Bohmeh cauh diendeih,

Raeuz cij ndaej majhung.

Bohmeh geijcib bi,

Hix mbouj vi mbouj ndaq,

Daengz gyoengqde bae baq,

Caj seizlawz cij hauq?

Caeuq bohmeh caez youq,

Vah gawqgawq mbouj ca,

Daengngoenz doekroengz bya,

Heuh ma cungj mbouj dauq.

Bohmeh ciengx raeuz hung,

Yungh cien sin fanh hoj,

Lajmbwn vunz caez rox,

Aen bohmeh naekgywg.

Bohmeh bingh gwnz congz,

Aeu ciengz ngonz ciengz faenh(cam),

Dangh siengj aeu fukfaenh,

Gaenx soengq raemx soengq dang.

Bohmeh bingh gwnz congz,

Lwg aeu ngonz fugsaeh,

Ciengx raeuz hung daengz neix,

Aeu boiz ngeih boiz aen.

Miz naed bya gaiq noh,

Geiq hawj bohmeh gwn,

Daengz de baez roengz gumz,

Ciuh vunz mbouj raen naj.

Bohmeh caengz gvaqseiq,

Couh aeu geiq hawj gwn,

Dai roengz namh haeuj yaem,

Vaiz caeq gwn mbouj ndaej.

Bouxvunz youq lajmbwn,

Aensim mbouj doxdoengz,

Miz di guh ndaej roengz,

Couh gvengq lumz bohmeh.

Miz vunz mbouj doxdoengz,

Miz coenz dwk bohlaux,

Bohlaux dwg dijbauj,

Youq ranz caux vuenyungz.

Lumz bohmeh gijaen,

Ra coenz caenh doxnauh,

Daengz de dai mbouj dauq,

Baenzlawz bauq aencingz?

Daengq hawj beixnuengx raeuz,

Dauhleix caen aeu dingq,

Guh boux vunz hauqgingq,

Boiz cingz youh boiz aen.

Meh gwn can rox can,

Bingh daengz nanz bangbouj,

Daengq de baez mbouj youq,

Siengj raen mbouj caiq ma.

Ganq gyoengq raeuz ndaej baenz,

Niemh aencingz bohmeh,

Dai bae haeuj baihde,

Hemq mbouj deq ndaej han.

Bohmeh lix youq seiq,

Saedceij mbouj geij nanz,

Lai hawj gwn saek can,

Suenq lwglan roxleix.

Bohmeh lij youq ranz,

Miz can lai gwn deih,

Daengz de dai gvaqseiq,

Mou caeq hix yawj ndwi.

Yied eu yied miz lai,

Doengzcaez baiz dauhleix,

Couh eu daengz gizneix,

Cingj gak boux geiq maenh.

（sat）