Lungz Byauh saedcaih baeg lo, de swngzgei roengz lae, ndenq fagcax hawj Siu Cuh, aeu gengoenh uet hanh gwnz naj, hix riu naeuz:

“Ndei ha, hawj gou yawjyawj mwngz baenzlawz gvej.”

Siu Cuh coux gvaq fagcax, doxndiep myaeg de, dangqnaj boux daegmbauq lauxsaed cangqmaenh neix, mboujdan hawj de mbouj miz saekdi daezfuengz, caemhcaiq gaenq hawj de roxnyinh vunz gig ndei.

Lungz Byauh dauq doiq song yamq, ndwn youq laeng Siu Cuh, cij raen Siu Cuh coh de baez riu, doeklaeng cienq ndang gungj hwet, song ga loq hai, buenq maeuq dwk, fwngzgvaz dawz fagcax, fwngzswix gaem faex, raemj ganjfaex liz gwnz- namh sam song conq yienghneix, bakcax maiz raemj roengzbae, gofaex hung lumj lwgfwngzmeh yienghneix, cij raemj cax he couh goenq lo, fwngzswix baez cuengq couh lauxsaed ninz youq gwnznamh, guh ndaej youh ndeiyawj youh soengset, Lungz Byauh ndwn youq laeng yawj ndaej bak aj da daengx, itseiz lumz bonj- faenh gig baeg.

Siu Cuh mbouj oksing gvej caenh ndeu, iet hwet dauqlaeng muengh- muengh Lungz Byauh, najmong naeuz:

“Gwq ndwn youq baihlaeng gou cimyawj guhmaz?”

“Yawj mwngz hag guh ha!”

“Mbouj miz okcot!” Siu Cuh riu ndaej engq haenq lo,“Yaep he gyoengqde daeuj, yawj mwngz baenz- lawz youq ndaej roengz, lij mbouj vaiqdi deuz?”

“Gou siengj caiq bang mwngz saekdi.”

“Gaej lo, mwngz yied bang yied luenh ndwi.”

“Gou rox menhmenh hag ndaej hane.”

Siu Cuh doxndiep muengh de, boux daegmbauq neix, lumj dangzniu nei, vunz baez bungq, siengj uet hix uet mbouj bae lo.

“Gangj maz vahhoengq, mwngz vaiqdi deuz lo!”

“Gou baedauq buet le geijcib baez lo, gig mbouj yungzheih cij ra raen mwngz, baenzlawz nyienh yawj yaep he couh deuz ne? Mwngz simyak lai lo.”

Siu Cuh ngaemgyaeuj roengzbae, caem le yaep he, ngiengxgyaeuj yawj de, danq gaemz heiq he, fouznaih naeuz:

“Ndei ba! Yienghneix, mwngz couh bae baihde bang gou cug gij haz sauj ndaej dingz baenz song gwed, baenzneix yaep he gou couh mbouj aeu guh lo.”

“Ndei! Ndei!”

Lungz Byauh vih ndaej bang Siu Cuh okrengz sim’angq dangqmaz, baij hong hawj de guh, de roxnyinh gig miznaj.

Cug haz cungj beij gvej haz yungzheih ba, Lungz Byauh dawz cagndaij, rag soh cuengq youq gwnz- namh, doeklaeng genj le di gyaengh nyefaex vang youq gwnz cagndaij, caiq dawz haz bog he bog he bu youq gwnz gyaengh nyefaex. Aiq Siu Cuh song sam ngoenz gonq couh gvej doenghgij haz neix lo, gij haz neix gaenq deng ndit dak ndaej sauj dingz he lo, mbaw nyoengqnywt, daengj doeng vang sae, yaek gaemh baenz bog, hix mbouj yungzheih. Cingqngamj Lungz Byauh hix dwg lwg bouxguhnaz, yienznaeuz meh de cungh de, gig noix hawj de guh hongnaz, hoeng gij hong lingzsoiq neix, de hix rox guh di.(caengz sat)