Lwnh daih neix daih laeng,

Bouxboux baengh bohmeh,

Daj iq daengz laux geq,

Mbouj ndaej veq liengzsim.

Lij lix aeu ciengx laeng,

Dai caeq daengz mbouj gwn,

Dangh raeuz rox guhvunz,

Couh hawj gwn hawj daenj.

Miz naed bya gaiq noh,

Aeu hawj bohmeh gwn,

Cog de dai roengz gumz,

Mbouj ma gwn le doih.

Bohmeh laep lwgda,

Couh baema yaemgyaiq,

Lumj rin doek roengz haij,

Daej fanh daih mbouj ma.

Dai bae haeuj lajyaem,

Caen mbouj ma yiengzseiq,

Lij lix lai gyaez deih,

Dai le daej mbouj ma.

Seizde raeuz lij noix,

Couh souhcoih baenzdong,

Bohmeh dai roengz gumz,

Cungj boizcingz mbouj liux.

Meh seng raeuz ndawndwen,

Byaek ndaw suen cungj geih,

Bohmeh raeuz youq seiq,

Raeuz aeu geiq boizaen.

Bohmeh haeuj yaemgan,

Raeuz daengx ranz daiq hauq,

Bohmeh ciengx raeuz laux,

Raeuz aeu bauq aencingz.

Gawhfaex iet gyang ding,

Hai langz cingq guhdauh,

Lwglan daejnyaunyau,

Bohmeh mbouj dauqma.

Dauh niemhfap ndawsim,

Lwg geiq cingz youh daej,

Dauh ciuling haeujfaex,

Lwglan daejswiswi.

Siuyieng dwk lajham,

Hauqnamz roengz gvihbaiq,

Bohmeh haeuj yaemgyaiq,

Daej dai mbouj dauqma.

Sam bi bae gip ndok,

Caiq yienj’ok bohmeh,

Lwg youh daejrere,

Niemh bohmeh aencingz.

Daengq lajmbwn beksingq,

Aeu hauqgingq bohmeh,

Dwgrengz dwg gyoengqde,

Hauq deq laeng mbouj youq.

Lwnh lwgmbwk lwgsai,

Cungj wnggai roxleix,

Bohmeh gij cingzngeih,

Raeuz aeu geiq ndawsim.

Dangh bouxlawz mbouj hauq,

Ndek bohlaux gyang roen,

Diendeih mbouj ndaej yungz,

Byaj gwnzmbwn couh bag.

Gou lwnh sou hauxseng,

Yaek aeu hengz cingqdauh,

Aeu hauqgingq bohlaux,

Daengzcog caux baenzndei.

Miz di gveng bohmeh,

Ndek de hojlwnlwn,

Mbouj hawj daenj hawj gwn,

Byaj gwnzmbwn couh bag.

Gienq lajmbwn vunz raeuz,

Vunzvunz aeu gingqlaux,

Bohmeh aen aeu bauq,

Daengz laux cij vuenyungz.

Guk mbouj gwn ndwenloeg,

Miz goek cij miz byai,

Daih bohlaux ndei lai,

Cog lwg gvai hix ciep.

Dwen daengz meh sinhoj,

Vunzraeuz rox couh geiq,

Raeuz mbouj caengz okseiq,

Meh fugsaeh gouj ndwen.

Song bak caetcib ngoenz,

Meh boenq youh siengheiq,

Cigdaengz raeuz doek deih,

Meh cij ndaej soeng ndang.

Meh ninz caengz rim ndwen,

Yamq haeuj suen cungj naiq,

Ndang nyieg rengz youh baih,

Yamqdin byaij mbouj baenz.

Dajleix bi youh bi,

Meh gizgiz gwnheiq,

Haet nyouh haemh youh haex,

Cungj mbouj ndaej simsoeng.

Gyangngoenz mbouj ndaej naengh,

Gyanghaemh mbouj ndaej ninz,

Sam geng daengz gyanghwnz,

Aeu bwnq lwg gwn cij.

Bae aeu haz aeu raemx,

Meh hix aemq baihlaeng,

Mbouj ndaej ninz ndaej naengh,

Meh cibfaen sinhoj.

（caengz sat）