Gou naengh youq naj daiz sij cih, youh yawj bonjsaw hozdung “byaij haeuj seizdaih moq”, gou cingq siengj sij gijmaz ndei ne? Seizde dingqnyi sing daxmeh gangj vah “daxgoeng mwngz youh ndoj ndaw rug……” Gou ukgyaeuj baez doengh, gig vaiq sij ok diuz daezmoeg：Bohlwg Caeuq Seizdaih Caez Baenaj.

Bohlwg neix couhdwg daxgoeng caeuq daxboh gou lo! Daxboh gou, ngamq 40 bi, de bonjlaiz dwg boux lauxsae son gauhcungh, sonsaw gig hwnjfwngz. Aenvih gunghcoz aeu- yungh de, de gyahaeuj le aen doih fuzbinz gunghcoz bae. Daxmeh raen de lauxsaed simsoh, yousim yubyub. Daxboh cix bekbek najaek naeuz：“Cuengqsim! Gou dwg hag gvanjlijyoz conhyez, gij hong neix nanz mbouj ndaej gou!” Daxboh ciengzseiz gangj：“Raeuz aeu riengz seizdaih fazcanj byaij, fuzbinz hix dwg ityiengh. Dang- yienz, mwh byaij baenaj swhgeij aeu rox duenqdingh deng loek, miz siengj- fap swhgeij, mbouj ndaej laebluenh bae gaen vunz!”

Miz baez ndeu, daxboh guhhong ngamq ma daengz ranz, soujgih couh yiengj lo, lingjdauj heuh de ngoenz daihngeih cinjseiz haihoih. Ngoenz daihngeih, daxboh gyanghaet haj diemj cung couh hwnq, hai gyaq mohdozceh de okdou bae lo. Baihrog rumz hung fwn hung, daxmeh youq ranz caiq hix ninz mbouj ndaek lo. Diuzloh fuzbinz, daxboh itcig byaij ndaej gig sinhoj, hoeng de coengzlaiz mbouj geq haemz geq hoj gvaq, ma ranz le, lij ciengzseiz gangj gij saeh fuzbinz hawj dou nyi.

Miz baez ndeu gou aengq hoz hemq: “Daxgoeng, gwn ngaiz——” Hoeng mbouj miz vunz han. Gou ok aen geiqmaeuz ndeu, hai densi cuengq sing ceiq hung. Ndaw densi cingq boq “Siz Ginbingz cungjsuhgi……”, yi, gou ngamq cienq ndang gvaqdaeuj, couh raen daxgoeng ndwn youq baih- laeng gou, cijraen de iet hoz gungj hwet yawj densi, gou lienzmuengz buen eij daeuj hawj de naengh. De mbouj dwg gwn ngaiz gonq, de sien gvansim guekgya daihsaeh. Daxgoeng cimyawj densi, song lwgda rongh- rikrik, da cungj mbouj yaep yawj dwk densi.

Siz cungjsuhgi baez dwen daengz gij saeh guekgya hwngvuengh fouqmiz, daxgoeng couh haenqrengz ngaek gyaeuj, riuhwhw dwk. Ndaw ranz miz goenglaux baenzneix gvansim guek- gya daihsaeh, gwndaenj dou mizyinx lai lo. Gaxgonq daxboh caeuq dax- goeng gig noix gangjvah, seizneix, song de cungjsuenq miz vah habhoz doxgangj lo, gwj gangj gwj mizyinx. Gijmaz“it rangh it loh”ha, song aen bak bi ha……Daegbied dwg gangj daengz cawzraeg yakrwix, song bohlwg ceiq boiqfug Siz Ginbingz cungjsuhgi, cawz rwix cawz yak baenzneix dwg- rengz, aenmbei mbouj hung couh itdingh guh mbouj ndaej daengz ha!

Yawjyawj ranz gou doiq bohlwg caeuq seizdaih caez baenaj neix, gou hix mbouj haengj doeklaeng, aeu bit geiq gij goj gyoengqde roengzdaeuj. Ngoenzneix, sien geiq daengz neix, gou ietiet aenhwet, yaengyaeng hup hwnj bonjbouh.

(lauxsae son’gyauq Veiz Gyangh- bingz)