Duzroeg youq henz conghcuengh hemqcebceb, mbawfaex riengz rumz bibuengq ciengqgo caca, makgaivaiz youq gwnz faex langh heiqrang okdaeuj, laj gofaexrungz cienz daeuj sing riu angqyangz lwgnyez, duzbid youq gwnz gofaexrenh heuh mbouj dingz, lumjbaenz vih saedceij siujyoz demgya cezcou. Hagdangz dou geijlai nauhyied ha!

Siujyoz Hawj gou nanzlumz dwg yienghceij Veiz lauxsae: Ndang hung- sang, naengnoh mbouj suenq hau, doiq lwgda mbouj hung cix gig rongh- ndaem. Yiengh de mbouj lumj lauxsae wnq unqswnh mizleix, de dwg boux bakvaiq simndei ndeu. Miz baez ndeu, gou yawj bonjsaw《Hekgvaiq Vunz- vaisingh》, ndawsim dwglau raixcaix, lij loqraen vunzvaisingh gaeb gou bae buqdungx. Veiz lauxsae rox le, riugaekgaek naeuz:“Danghnaeuz mwngz heiqlau swhgeij deng gaeb bae, mwngz couh lwnh gou, gou dawz vunzvaisingh gaeb ma cuengq haeuj loengz bae hawj gyoengqvunz ngonz- yawj bw!” Gou dingq le, sim mbouj ndum lo, riu dwk cam: “Danghnaeuz vunzvaisingh daeuj caq digiuz, raeuz baenzlawz banh?” Veiz lauxsae sing riu fwt dingz lo, de caemcingx naeuz: “Danghnaeuz vunzvaisingh caen dwg daeuj, lau hix mbouj miz yungh ha! Miz di saehcingz yaek daeuj cungj daeuj, daeuj le, mwngz couh itdingh ciepsouh de.” De cimyawj gou, youh riu naeuz.: “Mwngz hix ndaej cingj vunzvaisingh gwn boi cazbanringz ha!”

Youh miz baez ndeu, banhcangj singhung hemq:“Vaiq di daeuj baiz- doih lienh diuqfoux!” “Diuqfoux? Gangj gijmaz, diuqfoux?” Gou miz di ngeiz lo. “Gou din fwngz genggyat hix yaek hwnjdaiz diuqfoux?” “Daengx ban cungj daeuj lienh, vaiq di!” Daengx ban doengzhag comz youq laj gofaexrungz, mbouj ndei eiqseiq riengz Veiz lauxsae hag dungcoz diuqfoux. Dou dingzlai vunz cungj lumj foux “gienzfiz” nei luenh vad.

Daengz ngoenz sam nyied sam, dou gag daz naj cang ndang, youq laj nditrongh raeujrub, baizdoih hwnj daiz lo. Yinhyoz yiengj le, gou ndawsim miz di yup: Mboengqneix gou cungj lienh ndaej gijmaz la? Lumz dungcoz baenzlawz banh? Youh siengj: W, vah bouxlaux gangj “rox doengh couh ndei”, lauxsae gangj gwnz daiz youq- gaenj dwg naj rox riu bw. Daengz gyang daiz, dou lumj boux gwn laeuj fiz ityiengh luenh diuq luenh foux, geiq ndaej dungcoz youh gaen mbouj ndaej hwnj yinhyoz, mbouj geiq ndaej dungcoz couh gag foux, lwgsai cix dwg luenh foux guh najgvaiq. Dou gwj foux gwj angq, laj daiz gyoengq bouxyawj riu baenz dungx in bae, sing bekfwngz, sing hemq raq ciep raq. Dou foux ndaej engq haenq lo. Doeklaeng dwg ban dou aenfoux《Lwg Bouxcuengh Angq》ceiq miz daegsaek, ndaej daih’it mingz ne! Dou roengz daiz le, daengx ban doengzhag cungj got youq doxcaez, angq hemq mbouj dingz, youh luenh foux hwnjdaeuj lo. Veiz lauxsae cix dwg youq henz doiq dou riu.

Couh yaek bizyez lo, dou geijlai sij mbouj ndaej hagdangz dou ha! Neix cingq lumj Veiz lauxsae gangj haenx, yaek daeuj cungj ndaej daeuj, daeuj le, couh itdingh aeu ciepsouh de.

(boux lauxsae son’gyauq Cuh Veimingz)