Lungz Byauh angqvauvau, sik- haek gip hwnj fagcax Siu Cuh, gungj hwet bang de guh hwnjdaeuj.

Siu Cuh doq gwn haeuxcuk doq yawj de, gwnz naj riunyumnyum.

“Menh di, haeujsim gaej raemj deng ga mwngz.”

“Mbouj rox deng hane!”

Lungz Byauh mbouj guhsing vad fagcax, hoeng roengzrengz haenq lai, mbouj rox gyaumwnz, mbouj gvej ndaej geijlai nanz, couh gaenq hanh conh lumj doek fwn nei baegfofo lo, cingqngamj baihnaj miz caz gaeu- lungzcoengz cab gofaex iq, geuj youq giz ndeu. Lungz Byauh gvej goenq le gofaex iq, hoeng lij deng gaeu- lungzcoengz heux, laebdaeb raemj geij baez, cij raemj ndaej roengz gaem iq neix. De doq roengzrengz raemj doq ngeix gij dungcoz Siu Cuh, yawj de guh gig vei, baenzlawz swhgeij guh cix baenzneix dwgrengz.

“Baenzlawz yiengh?” Gij sing Siu Cuh daj baihlaeng yiengj, “Mbouj aeu baenzneix roengzrengz? Youh mbouj dwg raemj goenqfaex hung.”

Lungz Byauh swngzgei iet hwet diem gaemz heiq he, dauqlaeng yawj Siu Cuh.

“Gou gvej ndaej mbouj noix luba?”

“Gou gaenq gwn donq haeux lo, mwngz cij gvej ndaej di neix.”

“Mwngz caiq yietnaiq yaep he, yawj gou guh ba.”

Lungz Byauh mbouj fug, laeb- daeb youh gungj hwet guh, hix mbouj ndaejhoengq bae uet gij hanh gwnz najbyak de.

Siu Cuh ndwn youq baihlaeng de, cimyawj gij ngaeuz hung de, gij yiengh de gvej nya saedcaih yakyawj: Song ga hai ndaej nyaenx hung, caekhaex ndiengq ndaej sangset, fagcax lumj miz geijcib gaen naek nei, cijaeu baez vad ndeu couh ndaej lo, de cix dwgrengz dangqmaz, raemj gofaex iq doeng laemx sae linh, mbawfaex luenh sinz, gwnz gyaeuj daengx ndang cungj venj miz mbawfaex soiq caeuq ngeiqfaex, lumj bouxvunz daj ndaw dongfiengz ndonj okdaeuj nei.

“Ndei lo ndei lo.” Siu Cuh miz di mbouj nyaenxsim, daegmbauq bamz neix hawj de miz cungj haengj, caen geizheih. De lanz fwngz Lungz Byauh, riuhehe naeuz:“Vanzlij hawj gou guh ba, yawj mwngz guh beij gou gag guh lij dwgrengz hane.”

(caengz sat)