Lwnh raeuz coenz daih’it,

Ndawsim aeu cik bungz,

Bohmeh ciengx raeuz hung,

Gunj aeu bauq aencingz.

Lwnh raeuz coenz daihngeih,

Lwnh dauhleix cingzyouz,

Niemh bohmeh seng raeuz,

Couh yaek aeu bauq aen.

Lwnh raeuz coenz daihsam,

Seizneix raeuz baenzyiengh,

Meh ganq lai dahnuengx,

Sinhoj ciengx raeuz hung.

Lwnh raeuz coenz daihseiq,

Seng raeuz gyaez geijlai,

Lwnh lwgmbwk lwgsai,

Cungj son gvai hwnjdaeuj.

Lwnh raeuz coenz daihhaj,

Lwnh mbanj laj mbanj gwnz,

Bohmeh ciengx baenzvunz,

Gaej lumz cingz lumz ngeih.

Lwnh raeuz coenz daihroek,

Daj goek lwnh hawj raeuz,

Meh caux goek hawj raeuz,

Daengz laux aeu hauqgingq.

Lwnh raeuz coenz daihcaet,

Meh ninz yaet ninz dumz,

Sam geng daengz gyanghwnz,

Haex nyouh dumz youh uet.

Lwnh raeuz coenz daihbet,

Ndwenngoenz ep geijlai,

Bohmeh laux yaek dai,

Raeuz aeu lai ciuqgoq.

Lwnh raeuz coenz daihgouj,

Ciengeiz gaej dungxbung,

Gwn raemx mbouj ndaej lumz,

Goengdaek vunz vat cingj.

Lwnh raeuz coenz daihcib,

Raemxda ndikbyaibyai,

Bohmeh dwgrengz lai,

Raeuz wnggai ciuqgoq.

Yied eu yied miz lai,

Menhmenh baiz dauhleix,

Bouxvunz seng youq seiq,

Aeu geiq aen bohmeh.

Gvaq giuz gaej lumz dwngx,

Gwn raemx gaej lumz mboq,

Niemh bohmeh sinhoj,

Aeu ciuqgoq ndaej ndei.

Guhvunz ndwn youq seiq,

Niemh cingzngeih bohmeh,

De nienzlaux bienq geq,

Goq de ndaej vuenyungz.

Duza rox bwnq meh,

Yiengz lij mez gwn cij,

Ganq raeuz bi dem bi,

Daengz dai mbouj sij cuengq.

Dawz sim beij swhgeij,

Seizneix raeuz guh ndaej?

De bienq geq aeu geiq,

Gaej daengz dai cij ienq.

Dag lwg mwngz lwg gou,

Dag simdaeuz seizneix,

Singsing heuh lwgsaeq,

Gyaez haeuj saej haeujsim.

Daengz doxlawh guh boh,

Goj doxlwnz guh meh,

Daengzcog raeuz bienq geq,

Cij rox de hungmbwk.

Yiemhranz diemj doiq diemj,

Diemj caeuq diemj doiq caez,

Byawz doiq bohmeh ndei,

Cog yaek miz fukheiq.

Yiemhranz diemj doiq diemj,

Diemjdiemj mbouj loekheiz,

Doiq bohmeh mbouj ndei,

Cog yaek miz bauqwngq.

Bouxlawz rox bauqaen,

Cog lwg mwngz couh hauq,

Daih gaen daih rox bauq,

Daengz laux miz vuenyungz.

Bohmeh nienzgeij laux,

Yiengh lawz bauq aencingz?

Daengq gyoengq raeuz aeu dingq,

Youz gag boux simsaeh.

Daengngoenz doek baihsae,

Mbouj geij gyae roengz gumz,

Bohmeh ciengx baenzvunz,

Mbouj ndaej lumz cingzngeih.

Seizneix de lij lix,

Hawj gwn di couh van,

De dai haeuj yaemgan,

Mbouj ma cam gwn faenh.

Langh lix couh hawj gwn,

Gunj boiz cingz boiz ngeih,

Daengz nienzlaux gvaqseiq,

Mou caeq gwn mbouj ndaej.

Lij lix mbouj hawj gwn,

Daengz seiz dai cij daej,

Guh gyaj cingz gyaj ngeih,

Seiqvunz rwix daengz goek.

Lij lix mbouj hawj gwn,

Daengz seiz dai cij ienq,

Miz nohbya baenz guenq,

Mbouj ma cuenh mwngz gwn.

Miz rwnx daengz bakdou,

Hix doxsou mingzfaenh,

Ngoenz siuyieng daengz haemh,

Hix mbouj maengx ma gwn.

Lij lix couh mbouj gyaez,

Dai le caeq rim daiz,

Daej mugmug myaizmyaiz,

Hix mbouj maij ma gwn.

Miz geij ciuh bohmeh,

Deq gag boux gag ngeix,

Gyoengqde youq seizneix,

Gwndaenj geiq ndawsim.

（caengz sat）