11 nyied 24 daengz 26 hauh dwg liggaeuq cib nyied cocib daengz cibngeih, Bwzswz Si Denzyangz Gih Denzcouh Cin Fungmax Cunh Mbanjmoqmax banh aen ciet fungsou cienzdoengj. Cocib gak ranz gag loengh gwn, ranzranz hohhoh guh ceiz guh dwk nauhyied oen’oen, nda baenz geij daiz byaek cingj caencik baengzyoux daeuj gwn ngaiz gwn laeuj; cib’it hix daengx mbanj itheij loengh gwn, bouxsai mehmbwk、bouxlaux lwgnyez cungj youq laj gofaex geq cungqgyang mbanj doxcomz, mbangj boux cix loengh gij byaek bakranz, mbangj hix nda daizheiq, hawj gyoengqvunz daeuj gwn ngaiz haenx itmienh gwn itmienh ngonzyawj minzsuz biujyienj, lumjbaenz fouxlungz fouxsaeceij、eu fwen、ram giuhva byaij daengj; cibngeih dwg gwn “laeuj sat daiz”, ngoenzde gij haeuxbyaek yaek gwn seuqliux cijndaej, doq gwn doq cungjgez gij hozdung bineix miz maz guh mbouj ndei, bimoq caiq gaijndei. Gyawj geij bi neix daeuj, gyoengqvunz Denzyangz Gih gvaq cietfungsou yied daeuj yied nauhyied, neix cungj dwg gij goenglauz duetgungz gunggeng dangdieg. Daegbied dwg mak- gaivaiz、makyungz daengj gij canjnieb donghsaeu miz daegsaek haenx bang nungzminz demsou baenzmiz.

(Vangz Gozsun/黄国顺)