11 nyied 24 hauh daengz 26 hauh, youq Ginhsiu Yauzcuz Swciyen, Gvangjsih Ginzcung Yisuzgvanj banh le bi 2020 baenz roix hanghmoeg hozdung bae daezsang gij naengzlig guhfwen Gvangjsih “sam gih” vwnzva vunzcaiz. Gij hozdung neix dwg vihliux daezsang gij suijbingz guhfwen canghfwen ndawbiengz daengx gih, doidoengh vwnzva fwen gih raeuz cienzciep caeuq hwngfat. Daengx gih gak dieg miz 80 lai boux canghfwen camgya hozdung. Cinz Giujhungz bouxveicangj caephengz Gvangjsih Hawfwen Hezvei caeuq Cinz Siengzcouh boux cungjbenhciz Gvangjsih Sam Nyied Sam Cazcise hawj gyoengq yozyenz hwnjdangz:《Guhfap Fwen Sizcwng》《Yawjngonz Caeuq Cekgej Fwen Gvangjsih》. Yienhciengz lij banh aen hoihcaezangq canghfwen, aeu “eu fwen ma lwnhgangj Daih Cibgouj Gaiq Haj Cung Cienzhoih cingsaenz”、“eu gij ndwenngoenz moq siujgangh vunzlai” guh cawjdaez bae bien fwen. Lauxsae itmienh son gij cihsiz lijlun, itmienh guh yiengh eu hawj gyoengqvunz dingq, gyoengq yozyenz mbangj gag eu mbangj habciengq, doq hag doq bien, yienhciengz doiqfwen, gij fwnhveiz goqdangz gig nauhyied.

(Se Cunghgoz/谢中国)