“Ba!”

Cingqngamj doek daengz ndaw mauhdiemx Siu Cuh.

“Ai——”

Siu Cuh deng hwk baez he, ceng mbouj geijlai dawz byongh cenj raemxcaz mbuq lo.

Lungz Byauh hix deng hwk nyengh le, naengh youq gwnz ngafaex lumj aen vunzfaexdoq.

Siu Cuh baez ngiengxgyaeuj, yawjraen baihgwnz miz boux vunz ndeu, doeksaet yat.

“A——”

Sing swenj lumj sing dwk cungq goksad yiengj youq gwnz bya caemrwgrwg.

“Siu Cuh, dwg gou!”

Lungz Byauh gig gvai, rox mbouj ndaej caiq nguh lo, doq gyod roengz- daeuj, ndwn youq dangqnaj Siu Cuh, mbouj dingz gungj hwet, sing daemq ngaeuq naeuz:

“Gaej swenj! Gaej swenj! Siu Cuh, mwngz baenzlawz fad gou cungj ndaej……”

“Maz saeh ha?” Boux dahsau youq henzgyawj sing hung cam.

“Haxbaenh dwg byawz swenj ha? Baenzlawz lo?”

“Siu Cuh! Dwg mbouj dwg mwngz swenj?”

“Byawz ha?”

“……”

Gij sing cam lumj bauqrengh nei, mbouj dingz youq seiq fueng bet baih hemq dwk, aen mbanj gyoengq dahsau neix caen doxbang doxrex.

Mwhneix, Lungz Byauh haemz mbouj ndaej gwnznamh doq dek miz diuz geh laeg he hawj de diuq roengzbae, de rox yaep he geij boux dahsau cungj yaek buet gvaqdaeuj lo.

“Mbouj……mbouj miz maz!” Gij vah Siu Cuh dap hawj Lungz Byauh liuh mbouj daengz, “Duznonnyaiq daj gwnz gofaex doek roengzdaeuj ndwi……”

Seiqhenz cienz daeuj gij sing riu, gij sing boux dahsau he couh daj cazrum baihde cienz daeuj:

“Caen raen duzfangz lo! Duz nonnyaiq he hix yienghneix yiep.”

Siu Cuh mumx baez ndeu, caengz Lungz Byauh baez da, sing hung dap:

“Hw! Duz nonnyaiq neix gig hung ne! Hwk ndaej gou yaek dai lo!”

Youh cienz daeuj raq sing riu, sing riu neix hawj Lungz Byauh sim caem roengzbae lo.

“Siu Cuh! Mwngz caen ndei!” De gamjgik ndaej vah cungj gangj mbouj baenz coenz，“Mwngz lumj gouq mingh gou nei, Siu Cuh, gou mbouj dwg daegdaengq haep mwngz……”

“Mwngz yaek dai ha, yupyup yiengyieng riengz gou——” Siu Cuh haeb faenz haeb heuj coh de, sing gig daemq naeuz， “Lumj duzfangz nei.”

“Gou——gou——”Lungz Byauh gig hojlienz gejnaeuz， “Haetneix gou caeux couh youq gwnz gofaex neix naengh, deng duzmoed nyep yaek dai bae, hoeng gou ning hix mbouj gamj ning baez he……”

“Bemx, byawz hawj mwngz mbouj guh bouxvunz cix guh duz- fangz?”

(caengz sat)