Vunz mbanj dou cungj nyinh- naeuz go faexminz caeuq bouxvunz doxlumj, hix miz gamjcingz. Bi boux daxgoeng ndaem de mbouj miz, de lumjnaeuz roxsoq nei, hix caeuq vunz ranz boux daxgoeng doxlumj caem roengzdaeuj. Vunz ndaw mbanj caj bae caj dauq, seiq nyied cungj gvaq lo, de lij dwg va hix mbouj hai mbaw hix mbouj ok, daengx ndang mokhumhum, lumj yaek dai nei. Yah buz haenx naeuz, go faexminz neix mboujcix caeuq boux ndaem de doxlumj dai bae, mboujcix couh bicog cij hai va. Faexminz bihaenx caen daengx bi cungj mokhumhum dahraix, hoeng dauqdaej mbouj dai bae. Bi daihngeih, faexminz hai va dauq lo, hai ndaej hoenghhwdhwd, hoengh ndaej gax- gonq bi lawz cungj beij mbouj hwnj, faiq hix lai gvaq doenghbaez haujlai. Vunz ndaw mbanj naeuz, lauheiq dwg hai bouj bi’gvaq ba.

Mwh gou doeg gauhcungh, miz bi ndeu sam nyied cosam, gou bae ranz sauqmoh. Yaek dauqbae hagdangz hwnjdangz, gou byaij gvaq laj go faexminz, raen miz duj va youh nding youh hung ndeu. Gou majhung ndaej cibgeij bi, lij caengz raen gvaq duj va faexminz lawz hung baenzneix nding baenzneix, go faexminz sang baenz cibgeij caengz laeuz, va doek roengz- daeuj gingqyienz mbouj vaih saekdi, geizheih dangqmaz. Gou couh siengj lo, duj va neix aeu bae hagdangz soengq hawj baengzyoux ndei gou, de haengjdingh maij.

Yienghneix, gou couh daiq de bae daengz hagdangz lo. Ngamq haeuj bakdou hagdangz, baengzyoux gou couh mbouj rox daj gyawz okdaeuj, yat gvaq doiqnaj gou ma, riuhihi hawj gou doeksaet yat. Gou siengj: Ndei, gou hix hawj mwngz doeksaet yat cij ndaej. Doeklaeng, gou hawj de laep da haeuj, daj ndaw daehsaw aeu duj va faexminz okdaeuj, yaengx youq doiqnaj de, hawj de hai da. Baengzyoux hai da yawjraen dujva, da ndongqgvakgvak caez. Mbouj yungh gangj, yawj gij yiengh de couh rox de maij dangqmaz lo, de nyinh- naeuz duj va neix dwg gwnz seiqgyaiq ceiq gyaeundei, yaek ciengxlwenx geiq youq ndawsim. Daj seizhaenx hwnj, de couh laeglemx heuh gou guh “dahcej va faexminz” lo, cibgeij bi gvaqbae, daengz seizneix, de lij dwg heuh gou “dahcej va faexminz”.

Gij ndaejgeiq go faexminz hawj gou dingzlai dwg gyaeundei. Hoeng, miz baez ndeu, mbanj gou ca di couh mbouj miz go faexminz neix lo.

Bi 2014 sam nyied cosam, gou bae ranz sauqmoh. Boux cihsuh yawj ndaw mbanj dingzlai vunz cungj maranz sauqmoh, swngzgei haihoih naeuz yangh cwngfuj bued cienz hawj mbanj dou hwnq aen daizheiq ndeu, de gietdingh raemj go faexminz hung henz aen gyausiz gaeuq bae, youq gizhaenx hwnq daizheiq. Gangj liux hix mbouj cam gyoengqvunz doengz mbouj doengzeiq, gaem hwnj fagfouj couh mbak haeuj goek go faexminz bae. Baez laep da, goek go faexminz couh deng de mbak bae vauh hung- hung ndeu lo. Daihgya raen le, neix lij baenz ha? Go faexminz neix lumj vunz nei, yawj gvaq geijlai boux lwgnyez majhung, hawj daihgya baenzlai angq- yangz, mwngz naeuz raemj couh raemj? Miz geij boux vunz bae rag cihsuh mbouj hawj de raemj, hoeng de rengz baenzneix hung, byawz rag ndaej gvaq de? Da yawj cihsuh couh yaek yaengx fouj roengzbae mbat moq lo, sawqmwh miz boux daxau ndeu gaeuz hwet gaem hwnj ndaek rin ndeu vut coh cihsuh. Mbat rin ndeu couh hawj cihsuh ringx roengz doem bae lo, najbyak de hix lwed lae roengzdaeuj. Boux daxau haenx dwg byawz ni? Dwg daeg lan daxgoeng ndaem go faexminz! Gij sieng cihsuh mbouj suenq naek, dan dwg lwed nding hawj vunz yawj lau. Doeklaeng, daizheiq hwnq baenz lo, lij dwg youq giz dieg boux cihsuh gietdingh haenx, go faexminz couh youq cungqgyang daizheiq, moix bi nyaengz dwg hai va hoenghhwdhwd, hoeng, boux cihsuh cix mbouj dwg boux cihsuh gaeuq lo……

Dayoz bizyez okdaeuj guhhong le, gou miz geij bi mbouj ndaej bae ranz sauqmoh lo, hoeng moix baez daengz sam nyied cosam, gou haengjdingh yaek dwk denva cam daxmeh va faexminz hai ndaej baenzlawz yiengh……

(sat)