Roek Bi

Seizgan, lumj benq aijsa he. Mwh gou seng roengzdaeuj, gizneix couh louz roengz coij rizdin daih’it. Seizneix, hawj gou dauq yawj aijsa, cimh baenz coij baenz coij rizdin haenx ba!

Daxbuz naeuz: “Saehcingz swhgeij swhgeij gag guh.” Gwn haeuxngaiz le, gou nyoengx daxbuz ok henz suijlungzdouz bae, gaemdawz vanjdawh, hag gij yiengh de, aeu sijgezcingh daeuj swiq gonq, caiq yungh raemxsaw cungswiq. “Swiq ndaej caen seuq ha! Cinyi ha, mwngz caen ak!”

Roek bi, gou louz roengz le rizdin “gagguh”.

Cib Bi

Seiq nienzgaep, gou camgya le doeg yawj saw doxdax. Doxdax gaxgonq, gou sim gig mbouj onj: “Meh, gou lau gou……” Daxmeh yawj gou, gangj aen gojgaeq ndeu: Canghdwknyaen loeklak ra daengz aenrongz duzyiuh, ndaw rongz miz song aen gyaeqyiuh. Canghdwknyaen dawz gyaeq daiq ma ranz, siengj lienh ok song duz yiuh gaeb nyaen. Yienghneix couh dawz song aen gyaeq cuengq youq ndaw gyaeqgaeq gaeqmeh ndaw ranz faeg haenx. Doeklaeng, miz duz yiuh iq ndeu mbouj fug gij mingh neix, bonghmbin hwnj gwnzmbwn bae, baenz duz yiuh ceiq ak ndeu; lingh duz yiuh iq mbouj gamj sawq mbin, doeklaeng bienqbaenz duz gaeq ndeu.

Ngoenz daihngeih, gou ndaej daengz gaujgienj, deng hwk dwk gaiqfwngz ok hanh lo, hoeng baez siengj aen gojgaeq daxmeh gangj de, couh dingh roengz sim daeuj, gaem bit vaiqvet dap daez. Doeklaeng, gou aeundaej daegdaengj ciengj.

Cib bi, gou louz roengz le rizdin “gagsaenq”.

Cib’it Bi

Gwnz diegnywj, mbawfaex nding loenq roengz- daeuj, gou damzdoeg “mbaw loenq mbouj dwg mbaw fouzcingz, vaq baenz namhcin engq hoh va”, danqheiq gyoengqde youq mwh sengmingh ceiq doeklaeng baenzneix gyaeundei. Gyanghwnz, ndau- ndeiq baeyouz youq mbawmuq ndaemndat veh ok diuz sienq vangungj ronghsag he. Yaepyet haenx, gou ganjgip mbaenj gij nyienhmuengh gyaeundei swhgeij. Ndaw ngoenzciet, bauqva ronghsag gyaeu- ndei, yungh caenh sengmingh dinjded de ciuq rongh daengx aen gyanghaemh, baenz gij gyaeundei ciengxlwenx geiq youq ndawsim gou!

Cib’it bi, gou louz roengz le rizdin “roxnyinh daengz gyaeundei”.

Cibngeih Bi

Daxgoeng daxbuz geq lo, yawj ndangdaej songde ngoenz beij ngoenz nyieg, gou nyaenx mbouj ndaej siengsim. Gyoengqde coz gvaq, hoeng sengmingh caiq coz daengz doeklaeng hix yaek geq bae. Caeklaiq, caeklaiq! Daxboh daxmeh caeuq doenghbaez ityiengh hauqgingq songde. Cungj miz ngoenz ndeu, daxboh daxmeh hix lumj daxgoeng daxbuz yienghneix geq bae, gou hix itdingh lumj daxboh daxmeh hauqgingq daxgoeng daxbuz nei, ndeindei doiqdaih bohmeh. Daj mbat gou daeuj- daengz aen seiqgyaiq neix, bohmeh couh ndiep dwk gou, mbouj ienqhoij mbouj lau dwgrengz vih gou gyauok daengx ciuhvunz gyoengqde. Gyoengqde cigndaej gou yungh ciuhvunz gou bae hauqgingq.

Cibngeih bi, gou louz roengz rizdin “hauqgingq bouxlaux”.

Dauq yawj baenz coij baenz coij rizdin youq laj daengngoenz ronghyabyab neix. Gou lwnh gou swhgeij: Doenghbaez, ciengxlwenx geiqmaenh; seizneix, haenqrengz baenaj; daengzcog, engqgya gyaeundei!

(roek nienzgaep Yangz Cinyi)