Siu Cuh yietnaiq le yaep he, dauqcungz gip hwnj fagcax youh gvej, Lungz Byauh siengj bin roengz faex bae, caeuq de gangjgoj, hoeng youh lau de hozhwnj, mboujyawx couh yienghneix laeglemx yawj de, mbouj- nex cengbak youh dem fanz.

Siu Cuh menhmenh gvej coh gofaex hung baihneix, Lungz Byauh engq mbouj ndaej bin roengz lo, cij ndaej nyaenx dwk, naengh youq gwnz ngafaex, baez ning hix mbouj gamj ning.

Mwhneix, ndit gaenq daj dingj- bya dak roengzdaeuj, Siu Cuh youq laj nditndat mbouj dingz dawz fagcax gvej nya, hanh gaenq dumz buhvaq caez, Lungz Byauh youq gwnz gofaex yied yawj yied sim’in. Sawqmwh, gwnz bya mbouj gig gyae, cienz daeuj le gij sing heuh:

“Siu Cuh ha——”

“Ai——”

Siu Cuh ndwn soh ndang de daihsing dap, gij sing sep youq gyang lueg hap dwk, gig rwenzred.

“Gwn ceiz lwi?” Gwnz bo baihde youh cienz daeuj gij sing lingh boux dahsau he.

“Ndei ha!”

“Dahyi ne?”

“Gou hix dungx iek lo——”

Yienzlaiz geij boux dahsau neix cungj youq henzgyawj gwnz bya neix ndwi, baez heuh couh han, caezgya doengz guhhong doengz yietnaiq. Lungz Byauh naengh youq gwnz gofaex, roxnyinh gij cingzngeih gyoengqde gig miz yinxdaeuz, caen siengj bienqbaenz dahsau, caeuq gyoengqde caez guhcaemz guh- hong!

Siu Cuh caen vut fagcax dahraix, dawz aen doengjfaex iq daengz laj faexhung, naengh youq gwnznamh, menhmenh biengj hai fa doengjfaex. Lungz Byauh couh youq dingjgyaeuj de, ngaemgyaeuj yawj roengzbae, ndaej raen ndaw doengjfaex iq cang miz ceiz, Siu Cuh dawz mauhdiemx daengj youq gwnz gyaeujhoq guh daiz, aeu nyecuk guh dawh nip gij ceiz gaenq cien ndei, gaemz hung gaemz hung gwn hwnjdaeuj lo.

Yawj gij yiengh de gwn ndaej diemzsubsub, Lungz Byauh gwnz gofaex hix dungx iek hwnjdaeuj lo, caeklaiq de ngoenzneix daiq gijgwn daeuj riengz. De daj ndaw daeh mbon ok aen lwgmaenz, laeglemx ngaep dwk, byawz liuh daengz ndaw daeh lij miz aen lwgmaenz caengz coq ndei, gingqyienz deng fan okdaeuj, cigsoh doek roengz laj gofaex bae lo.

(caengz sat)