Mboengqneix, itcig naemj yungh Sawcuengh raiz di doxgaiq ndeu, hoeng miz bi ndeu mbouj yungh lo, gaem gonj bit hwnjdaeuj youh mbouj rox raiz maz, baenzlawz raiz. Siengj ndaej haujlai nanz, gietdingh raizraiz go faexminz mbanj dou.

Youq henz aen gyausiz gaeuq mbanj dou miz go faexminz hung ndeu, daj mwh gou ndaejgeiq hwnj, de couh youq gizde lo. Go faexminz neix dwg mbanj dou boux daxgoeng ndeu ndaem, aiq miz 60 lai bi lo, 3 boux vunzhung fwngz gaem fwngz umj goek faex de vanzlij caengz gaeuq. Doiq gou daeuj gangj, go faexminz neix couhdwg mbanjranz, couhdwg yah buz swnzsienh hozunq ndeu, yawj gou majhung baenzvunz. Youq ndaw uk gou, gij saeh gvendaengz go faexminz neix caen mbouj noix.

Daengx mbanj vunz, gag daxmeh gou rox dwkcim, dingq daxmeh lwnh dwg bi de ndaej 18 bi, goengda baenz binghnaek youq yihyen, de bae yihyen ciuqgoq couh hag rox dwkcim. Vunz ndaw mbanj rox daxmeh gou rox dwkcim le, miz maz bingh yaek dwkcim cungj cawx yw daeuj ranz gou hawj daxmeh gou bang dwkcim, mizseiz doenghduz baenzbingh hix miz vunz cawx yw daeuj hawj daxmeh bang dwkcim dem, neix caen hawj vunz riu ndaej dungx in. Daxmeh hainduj bang vunz dwkcim mbouj aeu cienz, hoeng bang vunz dwkcim dwk ndaej byongh bi le, aen rwz de dingq mbouj singj geijlai lo, gig geizheih, gaxgonq mbouj miz maz ciudaeuz. Bae yihyen hawj canghyw yawj, canghyw hix yawj mbouj ok maz, doeklaeng hixnaengz cungj dingq mbouj ndaej- nyi lo, bae yihyen yawj canghyw moq hix ciuqyiengh yawj mbouj ok maz, daengx ranz vunz vih neix simyou dangqmaz.

Miz ngoenz ndeu, miz yah buz ndeu daeuj ra daxmeh, de naeuz de rox vihmaz aen rwz daxmeh gou dingq mbouj ndaejnyi. Daxboh gou cam de vihmaz, de naeuz neix dwg aenvih daxmeh bang vunz dwkcim maz cungj mbouj aeu, famh duzfangz lo, baezlaeng bang bouxwnq dwkcim itdingh aeu saekdi doxgaiq cij ndaej. Cungj vah neix caen dwg gangj mbouj doeng, geizheih dangqmaz, aen rwz dingq mbouj ndaejnyi haengjdingh dwg aenvih baenzbingh, canghyw yawj mbouj ok cixbah, gyawz dwg aenvih famh duzfangz? Daengx ranz vunz byawz hix mbouj saenq gij vah yah buz neix gangj, daegbied dwg daxboh, de lij damz danghnaeuz caen miz duzfangz, daihgya cungj fatcaiz caez lo.

Vunz ranz gou mbouj saenq, hoeng ndaw mbanj cix miz haujlai vunz saenq bw! Daj seizhaenx hwnj, byawz daeuj ranz gou dwkcim, daengz bingh ndei le cungj gag rox aeu hawj daxmeh gou 5 hauz cienz, seizneix ngamq mbouj raen geij hauz ngaenz lo, hoeng 5 hauz cienz youq mwhde doiq dou daeuj gangj caen mbouj noix lo. Caen geizheih lo, daj baeznduj sou cienz le, aen rwz daxmeh couh menhmenh dingq ndaejnyi lo, sou ndaej 5 baez le, aen rwz daxmeh gingqyienz ndei caez lo! Doeklaeng yah buz haenx gangj maz haujlai vunz cungj saenq, daegbied dwg daxmeh. Dangyienz, daxboh gou lij dwg mbouj saenq, de naeuz neix mbouj gvaq dwg dingjlingz ndwi.

Daengz mwh aen rwz daxmeh ndei le, de youh simyou lo, aenvih 5 hauz cienz mbouj noix, daihgya gvaq ndwenngoenz hix mbouj vei, aeu maz daeuj dingjlawh cij baenz. Mwhde dwg liggaeuq sam nyied, va faexminz hai hoengh, moix ngoenz gou cungj haengj hwnq caeux bae henz aen gyausiz gaeuq gip va faexminz, va hai yaek sat couh gip faiq faexminz. Neix mbouj dan dwg gij saeh gag gou maij guh, ndaw mbanj haujlai lwgnyez cungj maij, va nding faiq hau, ndeiyawj raixcaix, suenq dwg gij saeh mizyinx seiznyez ndawde cungj ndeu ba! Daxmeh raen gou gop gop faiq hau ndeu haeuj ranz, da ndongqgvakgvak. “Miz lo, faiq faexminz! Baezlaeng byawz daeuj heuh gou bang dwkcim, couh hawj lwgnyez ranz de bae gip di faiq faexminz daeuj dingjlawh 5 hauz cienz ba!” Daxmeh naeuz. Dangh- naeuz mbouj dwg seiz miz faiq faexminz, couh caj seiz miz faiq faexminz caiq gip ma bouj. Doeklaeng, 5 hauz cienz couh bienqbaenz di faiq faexminz ndeu lo, itcig daengz seizneix, daxmeh lij dwg nanz mbouj nanz sou ndaej di faiq faexminz.

(caengz sat)