Bineix“song 11”（aenciet cawx huq 11 nyied 11 hauh）, Cungguek aen hawciengz siuyungh caiq langh rengz bongh hwnjfofo bae: Ginghdungh dan yungh 9 faen cung gai bae 2000 ik maenz doxgaiq; Denhmauh buenq aen cung gai bae 3723 ik maenz huq, daengx ngoenz gai bae 4982 ik maenz; gij huq dawz daeuj gaicawx de baudaengz daengx seiqgyaiq 220 lai aen guekgya, mauhgvaq 25 fanh aen binjbaiz caeuq 500 fanh bouxseng’eiq. Binghraq bwtndat vanzlij youq gwnz seiqgyaiq cienzlah, “song 11”langh yiengh rengz daegbied lai, daz daengx seiqgyaiq ginghci caemh bongh hwnj- fofo.

Sihbanhyaz faenh bauqceij《Bauq Seiqgyaiq》naeuz, “song 11”rengz- rwdrwd bae, neix gangj cingcuj liux- caez gij siuyungh Cungguek deng binghraq bwtndat gazlaengz gvaqlaeng seizneix dauqfuk lo, caemhcaiq caiq ok rengzdoengh moq coengh ginghci Cungguek dauqfuk.《Vazswngdun Youzbau》naeuz, bineix“song 11”mbouj lumj doengh bi gaxgonq, daengx seiqgyaiq giyez cungj muengh ngoenz- neix ndaej gai haujlai huq.

“Song 11”caiq hawj vunzlai rox gijneix, aen hawciengz Cungguek cingq bienqbaenz aen hawciengz seiqgyaiq fatdoengh aen gihgi hawj gak guek guh swnghcanj、daz daengx seiqgyaiq ginghci caemh bongh hwnjfofo. Cungguek miz 14 ik gyaeujvunz, gyoengqvunz souhaeuj youq duenh cungqgyang de mauhgvaq 4 ik vunz, dwg ndaw seiqgyaiq aen hawciengz hung rengzndumj ceiq lai. Ngozlozswh faenh couhganh《Lwgfeiz》naeuz, deng binghraq bwtndat gazlaengz, daengx seiqgyaiq bouxseng’eiq cungj muengh baengh hawciengz Cungguek ndaej baenzsaeh.（Gyauz Gihungz）