Gwnz bya rangh neix cungj maj rim go’nywj faexcaz miz buenq boux- vunz baenzneix sang, dwg fwnz ceiq ndei diegneix, doenghgij dahsau youq seizhoengq moix ngoenz hwnj bya gvej gorum raemj faexcaz, dak youq gwnz bya geij ngoenz, daengz banringzgvaq, couh dawz cagndaij cug gij rum caeuq faexcaz baenz song gwed, aeu hanzgyaeuq rap roengz bya bae, baij youq aen bakdou ranz caiq dak geij ngoenz dem, couh ndaej doi haeuj ndaw cang bae, ce seizdoeng caeuq seizcin bimoq yungh.

Gyoengqde hwnj bya doxduenq bae, roengz bya hix guhdoih dauq, ndigah gag gvej nya seiz, bouxboux cungj gig nyinhcaen okrengz, lauheiq daengz sat mbouj beij bouxwnq lai, deng naeuz yaez lai, doiq gij mingz- daeuz bonjfaenh mbouj ndei.

Lungz Byauh naengh youq gwnz ngafaex muengh coh Siu Cuh, de gungj hwet mbouj dingz gvej, mizseiz hix iet hwet, aeu laengfwngz uet hanh gwnz najbyak, beizbeiz byoem najbyak, doeklaeng youh gip hwnj fagcaxfwnz laebdaeb guhhong. Miz geij baez Lungz Byauh laihnaeuz de fatyienh swhgeij lo, aenvih lwgda de yawj coh gofaex hung baihneix daeuj, de cix mbouj yawj coh gwnz gofaex, hoeng hix hawj Lungz Byauh gag simvueng swdswd.

Ndaej yienghneix caenhcingz cim bouxgyaez gvej nya, Lungz Byauh roxnyinh gig rimhoz, cijaeu ndaej gwq yienghneix yawj, de couh mbouj miz maz maqmuengh wnq lo, hix mbouj gamj miz maqmuengh engq lai. Hoeng, youq gwnz ngafaex naengh ndaej nanz le, caekhaex in lo, song ga hix mwnh lo, gwnz ngafaex miz haujlai duzmoed mboujduenh bin de haeb de, de mbouj ndaej gwq naengh youq gizneix lo.

Seizneix, de cij gag roxnyinh deng gwn hoj lo, hainduj doiq gij hengzdoengh bonjfaenh lumj fatbag nei ngeiz hwnjdaeuj: Neix dwg guh maz ne? Sai le geijlai rengz, riengz hwnj bya couhdwg vihliux ndoj youq gwnz gofaex yawj de? Doenghgij ngoenz neix daeuj, vih de raemx ndoet mbouj roengz, haeux gwn mbouj imq, dauqdaej vihmaz?

Siu Cuh daengx roengzdaeuj lo, de naengh youq gwnz rin, aeu mauh- diemx beiz rumz, haep da yietnaiq yaep he.

Lungz Byauh caez sim cimyawj de, daj gij ngaeuz loq nyengq de yawj bae, ndaej raen laeng buhbeu mbang de gaenq aenvih ok hanh dumz- dwddwd lo, dumz ndaej gaiq hung he, buhbeu gaenjgaenj nem youq gwnz laeng de, ndawsim miz di sim’in cix gangj mbouj ok bak.

“Danghnaeuz de haq hawj gou, gou itdingh mbouj hawj de baenzneix sinhoj.”

Ndawsim de gag ngeix dwk, lumjnaeuz Siu Cuh gaenq dwg yah de lo.(caengz sat)