Gyaez, dwg maz? Gou geiq ndaej miz souj go ndeu heuhguh 《Gyaez Dwg Mwngz Caeuq Gou》, ndawde miz coenz vah yienghneix gangj——“Gyaez dwg mwngz caeuq gou, youq cainanh baihnaj mbouj bienq gij dapwngq; gyaez dwg gij fwngz mwngz, menh lumh gij sieng gou……”

Gou nyinhnaeuz, gyaez couhdwg duj va iq ndeu, youq gvangqlangh gij seiqgyaiq baihndaw, gaenq miz baenz cien baenz fanh duj va iq daeuj cang, cij aeu raeuz byaengq da yawj bae, cungj ndaej raen gij gingjsaek hoengzhoengz heuheu, caemhcaiq ndaej nyouq gij heiq homfwtfwt.

Gyaez hung mbouj miz dieggyaiq, goekgaen dwg daj gij mbouj miz seisim soengq hawj, hawj gyaez noengqnwt maj maengh. Aen ndwen- cieng neix mbouj bingzciengz, ciengz binghraq ndeu faemxfwg fatseng, gij angqyangz bi moq mbouj ndaej raen lo. Bonjlaiz wngdang dwg gij saedceij ndei daengx ranz vunz doxcomz, hoeng gij hong fuengzgaem dingj binghraq cienzmienh guh hwnjdaeuj, miz geijlai canghyw caeuq husw bae Vujhan gouq vunz, miz geijlai bouxbing caeuq gingjcaz buekmingh hendawz, miz geijlai bouxgagnyienh gag bae okrengz, mbouj rox miz geijlai gyaranz mbouj ndaej doxcomz.

Najdoiq aiq deng lah, mbouj aeu lau, guh ndei gij hong bonjfaenh. Cungh Nanzsanh, gaenq ndaej 84 bi, de heuh gyoengqvunz gaej bae Vujhan, hoeng, de cix doq bae Vuj- han, aeu bae yawjyawj gij cingz- gvang gizde. Neix dwg gij hong de aeu guh, mbouj ndaej ndoj mbouj ndaej vut. Huznanz boux husw Huz Bei, youq ranzbinghfuengz gekliz, aenvih daengx ngoenz aeu ywraemx siudoeg、raemxswiqfwngz、vazsizfwnj、ciujcingh cimq dwk, song fwngz de bonjlaiz youh hau youh oiq, seizneix gaenq bienq ndaej mbangqmbatmbat lo. Gij fwngz de hawj vunz daengx guek vunz gamjdoengh caemhcaiq sim’in. Husw Cuh Haijsiu bineix ndaej 22 bi, de yaemmuenz bohmeh bae cihyenz Vujhan, gicej caijfangj de seiz, heuh de hawj ndawranz bauq bingzan, de mbouj nyienh, ndaw lwgda de miz raemxda gvaengx dwk, de naeuz:“Gou mbouj siengj daej, baez daej gingq- hohda couh deng uq lo, couh mbouj guh ndaej hong lo.” Guengjsae raeuz miz boux husw heuhguh Liengz Yaujyaz, bineix de gaenq ndaej 27 bi, baenzneix coz, hoeng de dingz yamq roengzdaeuj lo. De bae cihyenz Vujhan, aenvih baeg gvaqbouh, laemx roengzdaeuj le, ciengxlwenx ninz gvaqbae lo, caiq hix mbouj rox ndiu lo.

Baihnaj miz canghyw miz husw hendawz, engqlij vutmingh, baihlaeng miz vunz simndei simsienh iet fwngz bae bang.

Sanhdungh bouxsai Lij Baujminz gag nyienh hai ci aiq it cien goengleix soengq baenz dun byaekheu bae Vujhan, gaenq yungh ngoenz he ndwi. Cam de vihmaz nyienh guh gij saeh neix, de naeuz de mbouj miz ngaenz cix ndaej okrengz. Doeklaeng de ndaej song fanh ngaenz dajciengj, de roxnyinh doeksaet youh geizheih, de nyinhnaeuz bonjfaenh cij dwg guh le gienh saeh iqetet he, de naeuz:“Danghnaeuz bouxboux cungj nyienh ok di rengz, simsienh bae bang, baenzneix gunnanz caiq hung hix mbouj youqgaenj!”

Miz guek cij miz ranz, neix dwg gij cingsaenz vwnzva conzdungj Cung- guek raeuz. Gyoengq yinghyungz youq cainanh baihnaj, vut ranz iq, goq guek hung, couh yienh’ok le cungj cing- saenz neix. Aen ranz dwg aen guek ceiq iq, aen guek dwg aen ranz cien fanh comz baenz, aen guek caeuq aen ranz doxing doxlienz.

Gyoengqde caeuq lwgminz sim doxlienz, dawz gij cwzyin hen bek- singq hen guekgya gwed youq gwnz mbaq swhgeij. Youq cien hoh fanh ranz doxcomz seiz, gyoengqde caeuq vunzranz doxbiek, youq gyoengqvunz cungj ndoj youq ndawranz seiz, gyoengqde enj aek baenaj. Ndigah miz vunz naeuz “gyawz miz maz ndwenngoenz an’onj, cij mbouj gvaq miz vunz bang raeuz rap naek bae gonq ndwi”.

Gyoengqde couhdwg boux rap naek, mbouj cam dailix, gagnyienh vih raeuz youq baihnaj dangj binghraq.

Gyoengqde couhdwg miz cungj saenqniemh neix, mbouj dam haemz- hoj, cij cam ndangdaej bouxbingh seizneix bienq ndei caengz.

Gyoengqde couhdwg bouxbing ndeu, mbouj dam yungyiemj, haeb heuj hen youq ceiq naj, mbouj doiq- dauq yamq he.

Gyoengqde couhdwg miz cungj cingsaenz neix, mbouj cam cienz ngaenz, ngaemgyaeuj guh gij hong ndaw fwngz couh baenz.

……

Sevei yawjnaek yinghyungz cij ndaej mboujduenh ok yinghyungz, bouxboux ceng guh yinghyungz cij miz yinghyungz ok baenz buek. Gij yinghyungz neix miz lijsiengj、nyienh dawzrap, guekgya couh miz maq- muengh, minzcuz couh miz maq- muengh! Gyoengq yinghyungz dingj- hoenx binghraq, raeuz aeu geiq youq ndawsim, seizseiz naemj seizseiz siengj. Gyoengqde couhdwg gij mbawsiengq seizdaih moq guek raeuz! Raeuz moix boux bouxcoz wngdang daj gwnz ndang gyoengqde sup aeu engq lai rengz, daj giz iq bae hag, daengz seizlawz guekgya、beksingq aeu raeuz okrengz seiz, mbouj aeu ngeix baenz lai、siengj baenz lai, doq guh hwnjdaeuj!