Youq Fuzsuih Yen, cijaeu mwngz bae daengz ndaw yienh gak dieg byaijbyaij, couh roxnyinh gij faenj- haeux Fuzsuih lai cungj lai yiengh, hawj vunz myaiz rihnangnang, siengj daih gwn donq ndeu le, gij feihdauh faenjhaeux baenzciuh nanzlumz.

Fuzsuih Yen binaengz fwnraemx cungcuk, dah daemz haemq lai, gij dah hunghung iqiq geijcib diuz, gij daemz gvangqgvangq gaebgaeb geij cien aen. Vihneix dangdieg nazraemx haemq lai, gij lizsij ndaem haeux gig gyaeraez, haeuxhau dwg gijgwn youq- gaenj gyoengqvunz ngoenznaengz gwn. Gyoengqvunz coengmingz Fuzsuih, lij aeu haeux daeuj guh gij faenjhaeux, faenjhaeux hix baenz gijgwn youq- gaenj seiqseiq daihdaih vunz Fuzsuih. Gij diemq faenjhaeux hunghung iqiq youq ndaw yienhsingz dauqcawq ndaej raen. Faenjhaeux miz luenz miz bej, gij boiqliuh、gij guhfap caeuq gij gwnfap mbouj daih doxdoengz aen yienh gak dieg.

Aenvih Fuzsuih Yen miz dah caeuq daemz lai, duzbya hix miz haujlai, gyoengqvunz hix maij gwn nohbya. Ndigah hix ciengz youq ndaw faenjhaeux coq nohbya, gij feihdauh gig miz daegsaek. Ndawde ceiq mizmingz dwg faenjbyacaq Fuzsuih Yen Gizliz Cin. Genj aeu byacaek、byalozfeih、byaleix sam seiq liengx naek, buq bya swiq seuq, gyaux mba haeuxcid, aeu youzduhdoem caq nohbya baenz saekgimhenj couh ndaej lo. Gij byacaq caengz rog byotcikcik, caengz ndaw oiqupup, ndeigwn raixcaix. Dawz gij byacaq ronq baenz naed iq, gya di youzduhdoem、gyu、ciengqyouz、coeng daengj, caeuq faenjhaeux doxgyaux couh ndaej gwn lo. Vanj faenjbyacaq ndeu, gij byacaq saekgimhenj, gij faenjhaeux saekhau, gij coeng saekheu, yawj hwnjdaeuj couh hawj vunz sim’angq simmaez.

Miz vunz maij gwn nohbya cug, hix miz vunz gyaez gwn bya’ndip. Gij bya’ndip caeuq faenjhaeux doxgyaux, hix ndei gwn dangqmaz, gij faenjbya- ndip Fuzsuih Yen Cunghdungh Cin ceiq ndeigwn. Gij faenjbya’ndip dwg aeu faenjcaq caeuq bya’ndip dox- gyaux baenz. Faenjcaq guhfap haemq fukcab, sien aeu raemxraeuj swiq seuq haeuxsan, cuengq roengz ndaw ndoengj, goeb geij caengz mbawgyoij, cuengq youq ranzdajcawj roxnaeuz ndaw ranz giz raeuj. Gvaq song sam ngoenz, gij haeuxoemq miz di heiq- soemj, yungh muhrin muh baenz giengh. Ce gij haeuxciengh giet geng, cai baenz ndaek lumj aen makbug baenzneix hung, dawz ndaek haeux- ciengh cawj cug daengz dingz, yienz- haeuh aeu aencaeu caq ok faenj, cigsoh haeuj ndaw rek bae cawj cug le daek ok, couh guh baenz faenjcaq lo. Gij bya’ndip genj aeu byavanx、byalienz、byalingz daengj, ronq gij nohbya baenz gaiq mbangmbingmbing le, coq youzlwgraz、ciengqyouz、gyu daengj doxgyaux ndei. Gwn faenj seiz, ndaw vanj cang bya’ndip, dawz gij faenj ngamq caq haenx raix roengz ndaw bae, caiq cuengq di coeng、byaekhom、suenq、hing daengj, faenjbya’ndip miz di heiqsoemj, hoeng gwn hwnjdaeuj sangjswtswt, caemhcaiq yungzheih siuvaq.

Gyoengqvunz ceiq maij gwn gij faenjnohgaeq yienhsingz Fuzsuih. Nohgaeq ceiq ndei dwg aeu gaeqdoj bonjdieg ndaw bya ciengx, cungj gaeqdoj noh saed feih hom, dwg gij liuh guh faenjnohgaeq ceiq ndei. Dumq gaeq sien youq ndaw rek cuengq raemxsaw, raemx aeu dumx gvaq duzgaeq. Dwk di laeujhaeux、hing、gyu roengzbae, deq raemx goenj caiq cuengq gaeq haeujbae, yienz- haeuh aeu feiz iq menhmenh dumq. Aeu diuz dawh baek roengz gagaeq bae, danghnaeuz mbouj miz raemx- lwed lae okdaeuj, gaeq couh dumq baenz lo. Ronq gij gaeqdumq baenz gaiq, caeuq faenjhaeux、coeng、ciengqyouz daengj doxgyaux, cuengq sieg raemxdanggaeq, faenjnohgaeq couh guhbaenz lo. Gwn cungj faenj neix, gawq ndaej gwn nohgaeq, youh ndaej gwn raemxdanggaeq, bouj ndang dangqmaz.

Ngoenz doek fwn roxnaeuz gvaqciet, vunz Fuzsuih maij guh faenjgienj. Lajmbanj Fuzsuih dingzlai ranzranz miz aen muh rin ndeu, danghnaeuz gvaqcieng gvaqciet rox- naeuz lienzdaemh doek fwn geij ngoenz, gyoengqvunz mbouj guh ndaej hong, couh geij ranz vunz doxcomz gap guh faenjgienj, faenjgienj youh heuh- guh “faenjgienjdoengz” roxnaenz “gienjgau”. Genj aeu haeuxlaeng ndei bonjdieg, cimq 6 daengz 8 aen cungdaeuz. Lingh cawj gij haeux guh giengh, gij giengh ndaej hawj gij naengfaenj niu di, mbouj yungzheih dek. Gaen haeux ndeu aiq boiq song liengx haeuxcug, muh haeux seiz, doq cuengq haeux doq cuengq giengh. Haeux muh baenz raemxmokhaeux, couh dwk feiz haenq cawj raemx goenj, daek sieg raemxmokhaeux ndeu dwk roengz ndaw dakbuenz, dan yinz bae, sikhaek cuengq haeuj ndaw rek, goeb farek ndei, aiq 8 faencung couh ndaej dawz ok. Vaiqvet bok naengfaenj roengzdaeuj. Aeu gij byaek duhnoh roxnaeuz coenggep caeuq nohmou soiq gaenq cawj cug guh sim, bu youq gwnz naengfaenj, caiq dwk di lwgmanh、ciengqyouz、youzduhdoem daengj, menhmenh gienj hwnjdaeuj, couh guh baenz faenjgienj lo. Gij faenjgienj naengfaenj raeuzratrat, gij hom faenj caeuq gij sim hom doxgyaux, ndei gwn dangqmaz. Guh faenjgienj seiz, ndaw ranzdajcawj miz sing vunz、sing muh faenj、sing coemh feiz, mizseiz rog ranz lij miz sing doek fwn “didi dada”, nauhyied fouzbeij. Ndaw ranzdajcawj miz diuz faexsaux ndeu, baihgwnz venj vengq dem vengq naengfaenj biegsatsat, ndaw hoengheiq cungj miz gij feih faenj hom caez. Gyoengq lwgnyez ceiq sim’angq lo, doxcomz hwnjdaeuj, bae cimz gij faenjgienj gak ranz gak guh, gwn ndaej aen dungx luenzlulu. “Mbwn doekfwn, gwn laeuj van”. Mizmbangj bouxsai lij dawz gij faenjgienj ronq baenz geij gaiq, caiq guh vanj cuksoemj ndeu, couh baij daiz gwn laeuj.

Cawz le faenjbyacaq、faenjbya- ndip、faenjnohgaeq caeuq faenjgienj, Fuzsuih dou lij miz haujlai cungj faenj dem, lumjbaenz faenjnohbit、faenj- soemj、faenjcauj daengjdaengj. Ca mbouj lai moix aen yanghcin cungj miz gij faenjhaeux miz daegsaek. Danghnaeuz gangj gij faenjhaeux daegsaek Fuzsuih gak dieg, gangj 3 ngoenz 3 hwnz cungj gangj mbouj sat bw! Angqcoux caezgya daeuj Fuzsuih gwn faenj!