●10 nyied 22 hauh, gicej yawj aenhoih sibinz gvendaengz hong caz gyaeujvunz daengx gih de ndaej rox, suenq daengz 10 nyied 21 hauh 0 diemj cung, Gvangjsih daihcaet baez daengx guek caz gyaeujvunz gaenq caz 1000 fanh ranz gvaq.

（Cau Cauh）

●10 nyied 22 hauh, Hozciz Si miz 1.85 fanh moux najdieg dajndaem gova, canjciz 7 ik maenz, 3500 boux vunzhong guh gij hong neix.

（Cingh Yaulinz）

●Bineix gou ndwen gonq, Gveigangj Si yinx vunz roengzcienz ndaej ciemdingh 220 aen hanghmoeg, gungh ndaej roengz 1130.84 ik maenz, gij hong guhsat de ciemq gij hong yinvu bineix de 205.6%. Ndawde, 167 aen hanghmoeg roengz ik maenz doxhwnj, guh sat gij yinvu bineix 107.74%; gyoepsuenq miz 171 aen doenghhong gvaq, guh sat gij yinvu bineix 103.63%, yienghyiengh cungj mauhgvaq yinvu.

（Dangz Cwngfangh）

●10 nyied 19 hauh, Nanzningz Liengzging Gih Nazmaj Cin comz vunz guh hozdung soengq cienz hawj doxgaiq, 47 aen giyez、danhvei gyaez coengh vunz de soengq 22.3 fanh maenz. Gyoengq ganbu cizgung ndaw cunh、cin gungh soengq daihgaiq fanh maenz, doenghgij cienz neix yaek yungh daeuj guh hongsaeh hawj vunzlai ndaej ikleih.

（Cinz Haijmingz）

●Geij ngoenz gonq, Bwzhaij Si Lijyouz Vwnzdij Giz fat mbaw mingzdan gvendaengz doenghboux daibyauj bouxswnjcienz feihyiz daengx si daihseiq buek, gungh 26 boux. Daengz seizneix, gij soq bouxswnjcienz si gaep Bwzhaij Si miz de gungh gyalai daengz 65 boux.

（Gvanj Linzvaz）