10 nyied 23 hauh banhaet, aen daihoih geiqniemh Cunghgoz Yinzminz Ciyenginh ok guek dingjhoenx Meijgoz haeujcoengh Cauzsenj 70 hopbi de youq Bwzgingh Yinzminz Daveidangz hai ndaej hoengh lailai. Cunghgung Cunghyangh cungjsuhgi、Gozgyah cujsiz、Cunghyangh Ginhveij cujsiz Siz Ginbingz youq gwnz hoih gangj gij vah gig youqgaenj caemhcaiq lai dawznaek baenzneix naeuz, ciengz ciengq dingjhoenx Meijgoz haeujcoengh Cauzsenj hungmbwk neix, dingj digoz cujyi ciemq dieg mbouj hawj de mbe’gvangq, hen Cungguek moq ndaej ancienz, bauj lwgminz Cungguek ndaej anonj gvaqngoenz, hawj gij saeh Cauzsenj Bandauj ndaej dingh roengzdaeuj, henhoh Yacouh caeuq seiqgyaiq an’onj. Ngeux gyaeuj dauq yawj 70 bi gaxgonq ciengz ciengq dingjhoenx Meijgoz haeujcoengh Cauzsenj hungmbwk de, hoenx haujlai ciengq hungmbwk miz lizsij daegdiemj moq, da yawj coglaeng Cunghvaz Minzcuz hungmbwk fukhwng, raeuz hoz baenz sim dingh lailai、gagsaenq bonjfaenh lailai. Raeuz yaek geiq maenh ciengz ciengq dingjhoenx Meijgoz haeujcoengh Cauzsenj neix hoj dwk nanz hoenx caeuq ndaejhingz hungmbwk lailai, fatyiengz gij cingsaenz dingj- hoenx Meijgoz haeujcoengh Cauzsenj hungmbwk de, daengj gyaeuj yamq din、enjaek baenaj, byaij hwnj diuzloh hwnqguh aen guekgya yienghyiengh cungj baenz sevei cujyi yendaiva, byaij coh diuzloh saedyienh aen loqsiengj Cungguek couhdwg Cungh- vaz minzcuz fukhwng hungmbwk, haenqrengz baenaj.

Lij Gwzgyangz、Liz Cansuh、Vangh Yangz、Vangz Huningz、Cau Lozci、Hanz Cwng、Vangz Gizsanh caemh daeuj ndaw hoihciengz hai hoih. Gyoengq veijyenz ndaw Cunghgung Cunghyangh Cwngcigiz、bouxsuhgi Cunghyangh Suhgicu, bouxfuveijyenzcangj Daengx Guek Yinzda Cangjveijvei, bouxveijyenz Gozvu, bouxyencangj Cuigauh Yinzminz Fazyen, bouxgenjcazcangj Cuigauh Yinzminz Genjcazyen, bouxfucujsiz Daengx Guek Cwnghez, vanzlij bouxveijyenz Cunghyangh Ginhveij caemh daeuj hai aen hoih neix.

Doenghboux daibyauj cansw geq、dungzci geq、vunzranz bouxlezsw Ciyenginh, doengh bouxdawzrap daeuz cunghyangh dangj cwng ginh ginz gak bumwnz caeuq Bwzgingh Si, bouxdawzrap daeuz gak minzcuj dangjbai cunghyangh、Daengx Guek Gunghsanghlenz caeuq boux daibyauj vuzdangjbai, doenghboux daibyauj guenbing Gaijfangginh caeuq vujgingj budui, boux daibyauj soujduh gak gyaiq ginzcung daengj daeuj caemh hai baez daihhoih neix.

（Sinhvazse）