Youq henz roen ndwn le caenh ndeu, de cij dingh ndaej roengz aen sim diuqbubbub, riengjret baenq gyaeuj dauqlaeng, buet coh gorungz hung lajde bae.

Dahraix, baezneix de liuh ndaej deng lo, haenzdah cienz daeuj gij sing yamqdin. Dahsau ndeu dawz aen bat buet roengzdaeuj, Lungz Byauh baez ngiengx gyaeuj yawj, cingq dwg de.

Gij yamqdin de youq gwnz mbaeklae haenzdah daengx le yaep ndeu, deng Lungz Byauh yawj ndaej de nyengh baez he, hoeng mbat yaep da de youh fukdauq caepcatcat, baez yamq baez yamq byaij roengzdaeuj, cuengq aen bat youq gwnz rin, daj ndaw bat dawz ok diuz gaen he youq ndaw dah swiq seuq le faenjnaeuj, uet faj naj maeq haenx.

Lungz Byauh ndwn youq ndaek rindah wnq. Gwq cim de, nyengh- nyengh gwq cim de, lumj yaek lai cim geij baez bouj doxdauq; de lumjnaeuz engq gyaeundei lo, naengnoh beij mbatgonq raen seiz engq hoengzmaeq lo, song lwgda yied daeuj yied ronghsag yinx vunz.

“Boux vunz mwngz dauqdaej baenzlawz lo?” De aeu gaen uet naj, daj geh lwgfwngz yawj Lungz Byauh baez he, sing daemq naeuz Lungz Byauh:“Vanzlij rox mbouj roxsoq, gwq yienghneix cimyawj gou guh maz?”

“Gou daeuj ra mwngz cib lai baez lo, ngoenzneix cungj hawj gou yawj guh gaeuq!”

“Mwngz laihdai!”

De biq Lungz Byauh gaemz ndeu, hoeng mbouj lumj caen hozndat.

“Vei!” Lungz Byauh mbei engq hung lo,“Doenghgij ngoenz neix mwngz bae gyawz lo?”

“Aeu mwngz guenj?”

“Hawj gou ngoenzngoenz daeuj baez he, youq haenzdah deq hoengq ndwi.”

“Laihdai! Byawz hawj mwngz deq!”

(caengz sat)