Youq ndaw aen ranz souyo gij hagdangz iq Cin Lecou Yienh Hawcou, miz aen daeh yo gij doz man gyaeundei Hawcou ndeu. Aen daeh neix gaenq miz 100 lai bi lo, gij doz man ndawde cungj dwg daj ndawbiengz soucomz ndaej daeuj, dijbauj raixcaix.

Cau Li dwg boux gien aen daeh neix, de naeuz miz baez ndeu, de caeuq daxmeh Yangz Gizsiengz cingjleix doxgaiq gaeuq, raen aen sieng gij gyacang daxmeh lajde at miz aen daeh iq duk ndeu, gig geizheih, couh yut okdaeuj cam daxmeh aen daeh iq dwg maz. Daxmeh gig siujsim coux aen daeh iq gvaqbae, mbaeumbengmbeng aeu fwngz baet aeu bak boq gij faenx gwnzde le cij naeuz aen daeh neix dwg daxmeh hix couhdwg daxdaiq Cau Li ce hawj bonjfaenh. Daxmeh siujsim riri caengz daeb caengz mbehai, cij raen ndawde lumj miz cek saw gaeuq. Daxmeh naeuz cek saw gaeuq neix dwg “cumhnyib” Bouxcuengh. Cau Li baez dingq engq geizheih lo, maz dwg “cumhnyib”? Miz maz yungh? Vihmaz daxmeh baenzneix haeujsim?

Deq ndaejnyi daxmeh gangj le, Cau Li lumj- naeuz dauq daengz ciuhgeq, dangqnaj lumjbaenz yawjraen boux dahsau Bouxcuengh gyaeundei ndeu, cingq youq gwnz bam guh gij man gyaeundei.

Daxdaiq Cau Li, Yaiz Cieng doekfag youq ranz hung ndeu, de cibgeij bi couh maj ndaej lengjlili. Gyae’gyawj ranz lawz miz daegmbauq, cungj dak yahmoiz daeuj guhmoiz, mbangj boux caegdaeuz hix yaek daeuj “ciengj bawx”. Vunzranz mbouj gamj hawj Yaiz Cieng okdou, buz de couh ngoenzngoenz son de guh nyib. Yaiz Cieng fwngz linjyoekyoek, ngamq bi lai couh hag rox guh nyib lo. Yienghneix buz de youh hawj de hag guh man, caemhcaiq dawz gij doz bonjfaenh yo youq ndaw “cumhnyib” okdaeuj hawj Yaiz Cieng hag. Yaiz Cieng hag ndaej youh vaiq youh ndei, gij vunj、buh miz gij doz man de guh baenz le, gyoengq dahsau ndaw mbanj cungj roxnyinh gyaeundei, doxceng bae ciuq guh.

Mwh Yaiz Cieng ndaej 20 bi, vunzranz couh haq de hawj ranz singq Yangz mbanj nden, song gvanbaz doxboiq dangqmaz. Byawz rox, doenghboux caeggeq da’ndat da’nding raixcaix.

Yaiz Cieng miz daeglwg mbouj geijlai nanz, bouxgvan de okrog youq gyang roen couh deng caeggeq gaj lo. De sim’in saej dek, ranzdaiq cungj ndiepgyaez de, yaek coux de dauq, hoeng ranzgvan de mbouj hawj dauqbae. Ranzgvan lau de buetdeuz, hix aeu fuengz caeggeq daeuj “ciengj bawx”, seizseiz baiq vunz dawz de. Yaiz Cieng youq ndawranz mbouj rox guh maz, caemhcaiq daj iq couh mbouj guh maz hongranz hongnaz gvaq, baenzneix de couh baenzngoenz youq ndaw rug guh man. De dawz man guh youq gwnz buhhwnjranz, hawj vunzranz dawz bae gwnz haw gai, doq baij okdaeuj couh gai liux lo. Yaiz Cieng baengh guh gij doxgaiq neix ra ndaej di ngaenz.

Ranz singq Yangz lij miz daeglwg iq ndeu, cibgeij bi gaxgonq couh deng gaeb bae dang bing, itcig mbouj miz siusik. Miz ngoenz ndeu de sawqmwh dauqma lo, seizde vihliux cienz ciuh ciep ciuh, bouxlaux couh hawj Yaiz Cieng haq hawj daeglwg iq. Bi daihngeih, Yaiz Cieng doekfag boux lwgmbwk ndeu, de couhdwg daxmeh Cau Li. Laihnaeuz gij saedceij couh baenzneix gvaq roengzbae, byawz rox gaijfang le, gvanlaeng aenvih deng gozminzdangj gaeb bae dang bing gvaq, couh deng gyaeng lo. Geij bi gvaqlaeng gvanlaeng dauq le, Yaiz Cieng gaenq seng lwg mbouj baenz lo. Vihliux cienz ciuh ciep ciuh, gvanlaeng caeuq boux mehmbwk he lingh baenz ranz moq lo.

Yaiz Cieng cijndei caeuq song boux lwgnyez doxbaengh, de ngoenzngoenz guh man, hoeng seizde gij man gaenq mbouj miz vunz maij lo, ndigah gai mbouj ndaej gyaq, baenzneix de engq gaenx guh lai guh gij man, cij ndaej cengqgengz ciengx bak. Daengz de ndaej 50 lai bi seiz, couh dava da’myox lo. Youq mwh daxmeh Cau Li ngamq ndaej 13 bi, Yaiz Cieng couh bae lo. De lij caengz ndaej ndeindei son dahlwg baenzlawz guh man. Yaek dai gaxgonq, de doiq daeglwg caeuq lwgbawx naeuz, aeu doiq dahnuengx ndei, gvaqlaeng bang de ra ranz vunz ndei he, song dauq buhhwnjranz ngaenz caeuq aen “cumhnyib” de ce roengzdaeuj, aeu hawj dahlwg guh gyacang. Doeklaeng, mwh daxmeh Cau Li roengzlae seiz, daeggo caeuq daxsauj couh ciuq gij vah Yaiz Cieng daengq bae guh, naeuz de aeu swnj roengzbae.

Daxmeh Cau Li gangj sat gij goj yo youq ndawsim neix, soeng le gaemz heiq raezrangrang ndeu. Cau Li geizheih cam daxmeh:“Vihmaz daxdaiq ce gijneix hawj mwngz, seizde ngaenzcienz caeuq reihnaz mbouj cungj dwg ce hawj lwgsai ha?” Daxmeh Cau Li naeuz:“Doenghbaez gij man dwg gij doxgaiq dajcang Bouxcuengh caeuq gij huq ngoenznaengz yungh Bouxcuengh, mehmbwk Boux- cuengh aeu rox baenzlawz guh man. Guh man gyaeundei aiq ndaej haq ndaej ranz ndei, guh mbouj ndei yaek deng yiemz ne. Ndigah dahniq Boux- cuengh daengz cib’it ngeih bi le, daxmeh couh aeu fwngz dam fwngz bae son dahlwg guh man, ranz lawz miz gij doz gyaeundei roxnaeuz gij man gyaeundei cungj gag yo ndei, mbouj dawz okdaeuj hawj caezgya hag guh.”

Gaengawq gaujguj cingqsaed, gij man daj Hancauz hainduj, daengz Mingzcauz Cinghcauz fazcanj daengz aeu gij sienqyungz lai cungj daeuj guh, cij ndaej hawj gij man yienh’ok saekcaij gyaeundei. Gij man ligdaih cungj dwg gij huq gunghawj, hix dwg gij doxgaiq Bouxcuengh youq ranz、cunz caencik、soengq hawj vunz、haq lwgmbwk aeu miz.

Cau Li vihliux hawj gij dozyiengh gij man daxdaiq ce ndaej engqlai vunz hag engqlai vunz yawj, couh gien gij “cumhnyib” neix okdaeuj. Dou fan yawj aen “cumhnyib” seiz, ndawde guhfap gaujgiu, gijsaek moqeq, couhcinj gaenq miz bak bi le hix mbouj doiqsaek. Gij doz ndawde daih dingzlai dwg gij dozyiengh gijhoz lienzdaemh, hix miz gij dozyiengh dujva caeuq gij dozyiengh duznon、 duzbya、 duzroeg nem duznyaen daengjdaengj. Aen “cumhnyib” neix mboujdan gij doz gyaeundei, caemhcaiq sezgi giujmiuq. Ndawde lij miz gek yo, gek iq aeu daeuj yo cim caeuq mae, gek laux di aeu daeuj yo gij doxgaiq caengz guh baenz, gek ceiq hung aeu daeuj yo gij doxgaiq guh baenz caeuq gij dozyiengh.

Yawj aen “cumhnyib” gaeuq neix, mbouj ndaej mbouj haenh gij coengmingz cojcoeng raeuz, gyoengqde gaengawq gij yienghceij diendeih couh ndaej veh mbaw doz guh man baenzneix gyaeundei. Yienznaeuz seizneix raeuz mbouj caiq dawz man dangguh gij doxgaiq cingvan, hoeng, gij doxgaiq dajcang Bouxcuengh lij dwg yungh doenghgij doz man gaeuqgeq neix. Seizneix, gyoengq mehmbwk Bouxcuengh guh ok gij man gak cungj gak yiengh, hawj gij dinfwngz neix ndaej laebdaeb swnjciep caeuq fazcanj roengzbae.