Bi 2012 daengz bi 2019, gih raeuz gyoepsuenq gemjnoix 932 fanh boux vunzgungzhoj, bingzyaenz bi gemjnoix 116.5 fanh vunz, 46 aen yienhgungzhoj ndaej duet mauh- gungzhoj bae, gij vunz ranzgungzhoj ciemq gij vunz sojmiz daj 18% roengz daengz 0.6%.

Bi’gvaq gih raeuz dieg gungzhoj vunz lajmbanj bingzyaenz moix boux ndaej gij cienz gag gaem gag yungh de 13676 maenz, beij bi 2015 gyalai 4209 maenz, bingzyaenz bi gyalai 9.63%, gij gyalai de lai gvaq gij soq daengx guek bingzyaenz.

Vunz ranzgungzhoj bouxboux cungj camgya gij baujyenj ywbingh giekdaej vunz ndawsingz lajmbanj, baujmaenh duenh yivu gyauyuz gij soq boux haeujhag ciemq gij soq boux bizyez de daengz 95.2%, hawj 24.8 fanh ranzgungzhoj ndaej gaij ranz- yiemj youq ranzonj, hawj 71 fanh vunz ranzgungzhoj ndaej senj dieg youq, hawj 153.2 fanh vunz ranzgungzhoj ndaej gwn raemx ancienz.

Youq Cungguek, Gvangjsih dwg gizdieg hoenxciengq gunggeng duet- gungz daeuz ndeu, vunz Gvangjsih couh daj gyaeuj daengz rieng cungj geiq maenh gij vah Siz Ginbingz cungjsuhgi daengq de, dawz ciengz ciengq gunggeng duetgungz dangguh gij cwngci cwzyin ceiq daeuz、aen gunghcwngz vunzlai gwndaenj daih’it caeuq gij seiz hwngfat mbouj luenh bungzdaengz, mizmbei laemxsim mbouj hoenx hingz caez couh mbouj dingz, hamj gvaq byagungzhoj, cawz bae rag gungzhoj, baenzneix hawj dieg gungzhoj ndaej bienq siengq bienq yiengh lailai.

（Cinz Cing）