Lungzsae angqhoh betcibngux、bouxsae dajcaeq、rom giuz、seizcou soundaej lai、doenghyiengh Vaizyenj gag miz、heiqcaijdiu、boux Liuz- sanhcej iqet、daenj gizbauz hawj vunzlai yawj daengj 8 aendoih cunzbyaij neix doxcaeh doxriengz baenaj, bae daengz gizlawz, boux- hekyouz cungj gaem soujgih hwnj- daeuj ingjsiengq, nauhyied baenzmaz bae, gijneix dwg aen ciengzmienh“betcibngux baiq ronghndwen”ndeu——gicej youq geij ngoenz ciet neix youq Yizcouh Gih Vaizyenj Cin caen da raen.“Ngoenz guh hozdung betcibngux baiq ronghndwen de, gyawj 2 fanh vunz doxcaeh haeuj ndaw Vaizyenj Cin daeuj.”Vaizyenj Cin dangjveij suhgi Lij Cwzsungh naeuz.

Youq Lozcwngz, diuq fouxlungz- nyangj Mulaujcuz、daenj ndangdaenj Mulaujcuz caeuq byaij hawj vunzlai yawj、bouxsai mehmbwk doiqfwen、diuq fouxfaexsaux、aemq bawxmoq daengj doenghgij hozdung mizyinx neix aen dam aen guh, dazyinx haujlai hekyouz riengz guh.

“Daengz Dunghlanz, aeu yawj Veiz Bazginz Gijnengvanj mbat ndeu.”10 nyied 8 hauh, yaek dauqbae le, boux hekyouz Lij Daicungh daj Gvangjdungh Cuhhaij Si daeuj de dangq Dunghlanz Gwzmingz Lezsw Lingzyenz guh giz ceiq sat aeu yawj de.

“Dou youq gaxgonq duenh ciet neix doi roek diuzroen lijyouz ndei、hozdung minzsuz angq gvaq ciet、gwzming lijyouz, gijneix youq duenh song ciet neix hwnghoengh lailai.”Hozciz Si Vwnzgvangjdijlijgiz fugiz- cangj Moz Ningz lwnh,“daengx si duenh ciet gozging neix gungh ciep hekyouz 175.59 fanh vunzbaez, lijyouz siuyungh 7.01 ik maenz.”

（Liu Ginglingz）