Gou miz daegnuengx cabheiq youh coengmingz he. Aenvih gou dwg daeggo, mwh daxboh daxmeh nyaengq, daegnuengx couh youz gou daeuj ciuqgoq lo.

Miz haemh ndeu, daxboh daxmeh miz saeh mbouj ndaej hoengq, heuh gou bang daegnuengx swiqndang. Ngamq roengz raemx bae, daegnuengx couh hemq “a” sing ndeu. Dai lo, nanzdauh raemx ndat lai ha? Gou sikhaek gaenjcieng lo, ganjvaiq aeu genfwngz bae sawq raemx ndat mbouj ndat. Yi, mbouj ndat ha! Cingq youq mwh gou mbouj rox baenzlawz guh, daegnuengx yaepda riu’ij naeuz: “Go, gou yaeuh mwh ne! Yawj mwngz lau ndaej! Hahaha!” Lwg cabheiq neix, caen dwg hawj vunz youh hozndat youh ndeiriu.

Ndang swiq daengz byongh, daegnuengx sawqmwh got hoz gou naeuz: “Go ha, mwngz baeg luba, gou gag swiq.” Gangj le aeu sujbaq dumz uet raemx gwnz naj. “Caj gou majhung le, gou hix ngoenzngoenz bang mwngz swiqndang.” Daegnuengx sing’oiq gangj dwk, gij yiengh lumj gig roxsoq nei, gou roxnyinh ndawsim raeujrubrub.

Lij caengz caj gou lawq gvaqdaeuj, daegnuengx sawqmwh dawz sujbaq dumz fid hwnj gwnz gyaeuj gou. Raemx swnh najbyak lae roengzdaeuj, lwgda gou deng myox lo, cij dingqnyi de riugaekgaek naeuz: “Go ha, gou gag bae daenj buh lo!”

Neix couhdwg daegnuengx gou —— cabheiq youh coengmingz, gyaez loengh gou, hoeng gou rox, de hix gig gyaez gou.

(ngeih nienzgaep Cangh Swnghih)