Lungz Byauh seizneix mbouj rox daj gyawz miz yinxdaeuz hwnjdaeuj, fanjcingq henz dah sangjswtswt, dingjgyaeuj miz gorungz hung he dangj ndit ndat, haxbaenh youh gwn raemxdah imq lo, hixnaengz song din caem haeuj ndaw raemx, swngzgei caeuq boux dahsau neix gangjriu.

“Mwngz riu maz?”

“Mbouj riu maz.”

“Gou caeuq mwngz cam roen baenzlawz byaij, mwngz lij riu gou dem, neix dwg fungsug gyawz?”

“Gij fungsug giz hakdoj.”

Dahsau neix caen bakmengx, di he hix cungj mbouj nyiengh.

“Mwngz gaej hangz gou dwg vunzseng, gou hix dwg vunz Cangh- couh!”

“Gou rox!”Dahsau neix ngiengx- gyaeuj myaeg de baez he, baeh naeuz:“Dwg vunz Mbanjgyaeujdah, mbanj de lij ok gvaq siucaiz hane!”

Coenz vah neix yienznaeuz gig gangjbaeh, hoeng Lungz Byauh dingq le nyinhnaeuz gangj ndaej deng. Aenvih caen Mbanjgyaeujdah ok gvaq boux siucaiz he dahraix, de dwg auda ndaw gyog Lungz Byauh. Yienznaeuz seizneix gaenq bienq le gij cidu gaujsi, Cingciuz hix gaenq vuenh baenz le Gozminz cwngfuj, siucaiz gawjyinz hix baenz le saehgonq, hoeng gyoengq- vunz youq ndaw rungh gungx, vanzlij mbouj lumz najrongh doenghbaez, Mbanjgyaeujdah iqet, ok gvaq boux siucaiz he, vunz daengx mbanj cungj roxnyinh gig miznaj.

“Mbouj caeuq mwngz dingjbak.” Lungz Byauh riunyumnyum gangj.

“Dwg mwngz ra gou roxnaeuz dwg gou ra mwngz?”

“Gou cij cam mwngz gizneix dwg gyawz!”

“Mwngz mbouj dwg naeuz giz- neix dwg ‘Mbanjsaulengj’ ha? Caen rox gangjbaeh! Lumj dahsau Mbanj- gyaeujdah sou bouxboux cungj gyaeu- ndei lumj dahsien?”

Dahsau doq gangj doq roengz- rengz bae gaemhdawz faenjnaeuj gij buhvaq saeg ndei, haeb di naengbak bonjfaenh, lumjnaeuz cingq faenjnaeuj gij genfwngz Lungz Byauh okheiq.

(caengz sat)