Haibak daeuj goengheij,

Hoh raeuz ndei fanh daih,

Angq lumj bya ndaw haij,

Raeuz daihdaih hoenghhwd.

Bi duznou goengheij,

Hoh haj seiq ndaej ndei,

Daj seizneix roengzbae,

Daihdaih ndaej vuenyungz.

Goengheij bi duznou,

Haidou couh gitleih,

Lwnh ndaw naz ndaw reih,

Bibi ndaej demsou.

Goengheij bi duznou,

Vaiz caeuq mou cungj maj,

Miz cienzngaenz daihbaj,

Vunzvunz gvaq ndaej ndei.

Goengheij bi duznou,

Vunzraeuz ndaej vuenyungz,

Miz daenj youh miz gwn,

Saedceij mwn doxhwnj.

Bi duzvaiz goengheij,

Ndaej leixseih fanh nienz,

Miz haeux youh miz cienz,

Yiengj cien bi vaiqvued.

Goengheij bi duzvaiz,

Vunzraeuz lai vuenyungz,

Dieggungz bienq diegfouq,

Vunz bouxboux fatcaiz.

Goengheij bi duzvaiz,

Baknaj haimuengmueng,

Lwnh ndaw rungh Mbanjcuengh,

Saedceij vuengh lumj feiz.

Goengheij bi duzvaiz,

Ndaej vaiqvued gvaq ngoenz,

Yienghyiengh cungj baenzgoeng,

Gvaq ndaej hoengzfwdfwd.

Bi duzguk goengheij,

Ndaej fanh seiq fanzyungz,

Dangj daiq raeuz duetgungz,

Roengzrengz cung baenaj.

Goengheij bi duzguk,

Ndaej yiengjfuk fanh bi,

Diegbyom bienq diegbiz,

Gizgiz cungj bienq ndei.

Doengheij bi duzguk,

Loegcuk maj ndaej ndei,

Vaiz mou yiengz bit gaeq,

Cungj ciengx ndaej baenzbang.

Doengheij bi duzguk,

Haeuxgoek ndaej demsou,

Lwnh ciengx gaeq ciengx mou,

Duzduz ngouqmaengmaeng.

Goengheij bi duzguk,

Miz fuk youh miz caiz,

Yienghyiengh cungj miz lai,

Riuvaivai gvaq ngoenz.

Goengheij bi duzguk,

Uk gvai cungj mbouj ca,

Saedceij lumj goraz,

Hai va hohhoh sang.

Goengheij bi duzguk,

Cungj ndaej fuk lailai,

Lwnh gwnz mbanj gwnz gai,

Vunz simhai sim’angq.

Bi duzdouq goengheij,

Ndaej seiq geiq fatcaiz,

Haeux lai cienz hix lai,

Ndaej vaiqvued gvaq ciuh.

Goengheij bi duzdouq,

Gungz bienq fouq ndei lai,

Angq lumj bya roengz haij,

Ndaej fanh daih vuenyungz.

Goengheij bi duzdouq,

Cienz caeuq haeux miz lai,

Laeuz moq laeb baenzbaiz,

Mbanj caeuq gai doxdoengz.

Goengheij bi duzdouq,

Saedceij raeuj lumj feiz,

Ngoenzngoenz gvaq ndaej ndei,

Lumj biengzbeih mbin angq.

Goengheij bi duzdouq,

Donqdonq laeuj buenx fwen,

Vunzvunz sim cungj vuen,

Seiqcawq rwenzdekdek.

Goengheij bi duzdouq,

Bouxboux cungj vuenyungz,

Ranzranz ndaej duetgungz,

Angq lumj lungz ndaw haij.

Goengheij bi duzdouq,

Nazhaeux gaiqgaiq baenz,

Namh bienq gim caeuq ngaenz,

Caen van gvaq gwn oij.

Goengheij bi duzlungz,

Dieggungz bienq diegfouq,

Miz cienz youh miz haeux,

Ndwenngoenz raeuj lumj feiz.

Goengheij bi duzlungz,

Loegcuk hung ndaej heih,

Vaiz mou yiengz bit gaeq,

Cungj gai ndaej cienz lai.

Goengheij bi duzlungz,

Mbung mbouj gaeuq coux haeux,

Gomiuz ndaej demsou,

Ndaw mbanj bouxboux riu.

Goengheij bi duzlungz,

Vunzgungz bienq vunzfouq,

Ngoenzngoenz miz cienz haeuj,

Gwndaenj mbouj yungh you.

Bi duzlungz goengheij,

Gwnz ngafaex giet aen,

Miz haeux youh miz ngaenz,

Baenzngoenz riugekgek.

Bi duzngwz goengheij,

Guh seng’eiq hwnghoengh,

Daengz ndaw ndoeng ndaw doengh,

Doenghyiengh cungj gai ndaej.

Goengheij bi duzngwz,

Diegfwz bienq diegndei,

Ndaem doenghgo roengzbae,

Bibi ndaej demsou.

Goengheij bi duzngwz,

Gaeq mou cwz yiengz max,

Duzduz hung youh maj,

Bang raeuz ra cienzngaenz.

Goengheij bi duzngwz,

Cienz lw miz daixbaj,

Lwnh diegbingz diegbya,

Gyagya miz cienz rom.

Goengheij bi duzngwz,

Diegfwz bienq diegndei,

Hai da muengh gvaqbae,

Gyaeundei lumj seiman.

Bi duzmax goengheij,

Riengz dangj bae cuk loq,

Gwn haemz youh gwn hoj,

Bongh bae coh siujgangh.

Goengheij bi duzmax,

Daj laj bongh hwnj gwnz,

Guekcoj gizgiz mwn,

Vunz angq mbin lumj mbaj.

Goengheij bi duzmax,

Ndaem naz ndaej demsou,

Lwnh ciengx gaeq ciengx mou,

Gaej simyou mbouj baenz.

Goengheij bi duzmax,

Daj ngeix bienqbaenz cin(caen),

Rin doek namh bienq gim,

Lwgminz ndaej yiengjfuk.

Goengheij bi duzmax,

Ndaem gyaj haeux giet gyouz,

Bibi ndaej demsou,

Ndwenngoenz raeuj lumj feiz.

Goengheij bi duzmax,

Guekgya fazcanj vaiq,

Yienghyiengh cungj miz lai,

Ndei gvaq haij lungzvuengz.

Goengheij bi duzmax,

Raen baknaj mizmuengh,

Lwnh Bouxgun Bouxcuengh,

Beixnuengx caez angqyangz.

(caengz sat)