Daxboh lumj aenranz yienghneix hung, ndwn youq henz de gou roxnyinh gig an’onj. Hoeng mwh daxboh caeuq gou guhcaemz cix lumj lwgnyez nei, guhcaemz ndaej beij gou lij ak. Daxboh lumj roeggyaeujmeuz yienghneix coengmingz, hoeng miz seiz hix guh di saeh huk, lumj mwh cauj byaek miz seiz dawz dangz dangqguh gyu.

Daxboh gig miz naihsim, mwh gou guh saeh guh daengz buenq couh mbouj siengj guh, de cungj hawj gou aen umjgyaez ndeu, lij naihsim son gou. Baez daengz ngoenzsinghgiz, daxboh cungj son gou gwih danci. Ngamq hainduj, gou cungj hag mbouj rox, gyaeujci gaem mbouj cingq, mwh gwih cungj ngut bae ngut dauq, gyaeujhoq lij deng bungq sieng dem. Gou miz di doeknaiq, mbouj siengj hag lo, daxboh cungj vah naek cingz laeg doiq gou naeuz: “Laemx le caiq benz hwnjdaeuj, mboujduenh sawq de, cij hag ndaej rox.” Dingq gij vah daxboh le, gou youh mbeihung laebdaeb hag, daxboh couh youq henz dang “bouxson”: “Daih’it aeu gaem gyaeujci cingq, da yawj baihnaj, gaej cungj yawj gaiq dabdin.” Ginggvaq geij baez laemxlaemx bungqbungq, gou dauqdaej hag rox gwih danci lo. Gou angq dwk coemj haeuj ndaw rungj daxboh bae.

Neix couh dwg daxboh gou. Daxboh gou gyaez mwngz.

(it nienzgaep Yauz Cih)