Daxboh gou dwg boux dangbing ndeu, daengx bi dingzlai seizgan cungj youq ndaw budui gvaq. Ndaw ranz gingciengz cij miz gou caeuq daxmeh song boux, yienghneix couh youz daxmeh soengq gou bae hagdangz caeuq ciep gou ma ranz.

Gou gyaez yien fwngz daxmeh, mup heiqvahom gwnzndang daxmeh. Cungj heiqhom neix dwg bingz raemxhom daxboh geij ngoenz gonq dak vunz daiq daeuj hawj daxmeh haenx.

Diuz loh bae hagdangz neix, gou roxnyinh gig gyaeundei. Daengx bi seiqgeiq miz gij gingjsaek mbouj doengz, riengz seizgan bienqvaq mbe fuk veh gyaeundei de okdaeuj.

Seizcin, ndit daj geh fwj mbaeumbengmbeng mbin roengzdaeuj, doek youq gwnz diegnywj heuoiq. Go’nywj riengz rumzcin diuq fouxangqyangz. Va- dauz henzloh hix hai lo, daj gyae yawj bae, lumj benq fwjmaeq ndeu, coemj haeuj lwgda gyoengqvunz bae. Seizcin dwg aen geiqciet gou ceiq gyaez he, sojmiz gingjsaek yawj hwnjbae cungj gig unqswnh, daiq hawj vunz maqmuengh lailai.

Seizhah, rumz banhaet sangjswtswt. Gou ciengzseiz yawjraen mbungqmbaj henzloh mbin- fengfeng diuqfoux, youq ndaw ndit angqyangz vad gaiqfwed, mbaeumbeng youh vaiqvued. Gofaex raemhrwd, sing non mwngz dingz gou heuh, singgo ndaw daswyenz baenzneix doxhuz, ngoenzngoenz mbouj dauqcungz.

Geiqciet seizcou ceiq dinj. Mbawfaex couh lumj deng saekhenj nyumx gvaq baez ndeu. Rumz bienq ndaej liengzsisi, moix baez ci daeuj cungj hawj mbawfaex bibuengq yaek doek. Yienghneix, gwnz loh bu rim mbawfaex loenq henjrwkrwk. Gyaqci nienj gvaqbae, mbawfaex fat ok sing yiengjcaca.

Hoeng daengz seizdoeng, danghnaeuz roengz nae, gou caeuq daxmeh couh byaij loh bae hagdangz. Naehau lumj dangzfaiq umqnemnem, gou cungj sij mbouj ndaej caij roengzbae, siujsim yupyup byaij youq gwnz de. Yawj naehau mboengmbup gwnz dieg louz roengz rizdin iqet gou, ndawsim gou cungj roxnyinh mbouj gvaqeiq.

Youq diuz loh neix, gou moix ngoenz cungj yawjraen haujlai doengzdoih. Gyoengqde caeuq gou ityiengh, moix ngoenz youq gwnz loh cungj miz gojgaeq .

Miz seiz, gou yawjraen “bouxcabheiq” ban dou lumz daiq cozyez lo, deng vunzhung miq le, gipgip muengzmuengz byaij youq gwnz loh dauq ma ranz.

Miz seiz, gou yawjraen Siujhuj ranznden caeuq daxboh de doxdax byawz buet ndaej vaiq. Yawjraen aennaj Siujhuj hoengzfwdfwd, gou hozhaenz dangqmaz.

Miz baez ndeu, youq buenqloh cuengqhag ma ranz, fwn doek lo. Gou caeuq daxmeh mbouj daiq liengj. Daxmeh Siujhoengz bannden ciq aen liengj ndeu hawj dou. Daxmeh Siujhoengz gaemndaet aenliengj youq gyang fwn deng rumz ci dwk yaek mbin bae de, yungh rengz cw youq gwnz gyaeuj Siujhoengz, swhgeij mbiengj ndang ndeu cungj deng fwn rwed dumz lo. Gou ngeux gyaeuj yawj daxmeh, raen byoem de hix ndik raemxfwn. Gou gipmuengz nyoengx aenliengj gvaq mbiengj daxmeh bae. Daxmeh cix naeuz gou nyi, gyoengq daxmeh cungj mbouj lau deng fwn rwed.

Gou cam daxmeh, daxboh seizlawz hix daeuj soengq gou hwnjhag, daxmeh riu dwk doiq gou naeuz, gwnz loh miz gangj miz riu neix, cungj dwg gyoengqvunz lumj daxboh nei hensouj. Laxlawz, gij gyaeundei gou yawjraen haenx, couhdwg ceiq ndei cingqmingz le daxboh buenx youq henz ndang gou.

(sam nienzgaep Denz Wnhgyauz)