De ndaej 18 bi bihaenx, maj ndaej sangset maenghcangq, ngoenz- ngoenz caeuq lwgnyez ndaw mbanj guhcaemz, de dwg bouxdaeuz bang lwgnyez, youq saivaq hoij fag cax he, daiq gyoengq lwgnyez hwnj gwnz bya bae ra caeggeq, yaek gouq daxboh de, doenghgij lwgnyez hix cungj dingq gij vah de, caez hwnj gwnz bya bae, hoeng ngamq byaij daengz gwnz bo, mizmbangj lwgnyez couh lau lo, gyoengqde yaeuh naeuz dungx iek roxnaeuz angjdin in, couh baez boux baez boux buetdeuz lo, de hix cijndei riengz dauqma, ndigah mbouj miz saek baez ndaej hwnj bya bae gvaq.

Gizsaed mwhhaenx gwnz bya mbouj miz maz caeggeq, geij bi haenx gwnzbiengz an’onj, doenghgohaeux fungsou, hwnj bya bae le hix mbouj miz maz yungyiemj, caiq gangj gwnz bya lij miz haujlai vunz bae aeu fwnz, eu fwen miz duzroeg han caemhcaiq mizseiz lij miz vunz hoiz, gaenbonj mbouj dwklau, cij dwg doenghgij lwgnyez mbeiiq lai lo.

Miz ngoenz oemq he, Lungz Byauh boux dog gag hwnj gwnz bya bae, de mbouj daiq nyaenx ndaej mbwq caemhcaiq mbouj fug saw. Hoeng gwnz bya fwzrikrik, gorum gofaex dauqcawq mwncupcup, rij dah rin gamj luenhnyagnyag, cungj mbouj beij ndaw mbanj ndeicaemz, de boux vunz ndeu youq ndaw bya bin le buenq ngoenz, youh hozhawq youh dungx iek, de gig saetmuengh, doeklaeng ra roen roengz bya lo.

Daj gwnz bya roengzdaeuj, de byaij roen loek lo, cienj bae cienj dauq, gingqyienz byaij daengz aen mbanj wnq bae, aen mbanj haenx cingqngamj youq henz dah, raemxdah sawdikdik, laeledled. De buet daengz henz dah, byotbyangq swiq naj swiq din fwngz, youh gop raemx gwn sangj le, ngiengxgyaeuj hwnjdaeuj, sawq- mwh yawjraen youq gwnz rin dah gizgyawj, miz dahsau he byaengq da yawj de, gokbak lij riunyumnyum.

Lungz Byauh miz di mbouj ndei eiqseiq yaek byaij deuz, hoeng lwgda dahsau haenx gyaeundei dangqmaz, lumj miz ronghmig ciuyinx de, Lungz Byauh youh caiq cimyawj dahsau haenx baez ndeu.

(caengz sat)