Youh gvaq cibgeij ngoenz, Dah- fung daeuj daengz henz dah ndoeng- cuk. De raen Daeglinz youh sim- angq youh yousim. Daeglinz lumj- baenz deng binghnaek nei, saeknaj biegmaumau, song ceh da daengx- swdswd. Miz maz saehrwix ha? Daeg- linz gyaeuj mbouj gamj ngiengx, gwnz fwngz gaem aen daeh siuqva songde dinghcingz seiz Dahfung soengq.

“Nuengx, aen daeh neix……gou……hap hawj……dauq hawj mwngz……”

“Beix, mwngz gangj maz ne?” Dahfung lumj dingqnyi byajraez yiengj, ca di vah cungj gangj mbouj ok bak.

“Gou mbouj dwg mbouj dwg vunzndei…… Gou yaeuh mwngz……”

“Guh maz, mwngz……bienqsim ha?”

“Gou mbouj dwg vunzndei…… Mwngz bae cimh boux daegmbauq wnq ba!”

“Geij ngoenz neix gou vanzlij vih mwngz yousim, liuh mbouj daengz mwngz bienqsim lo.”

Dahfung ndatheiq ndaq Daeglinz yaep ndeu, daj gwnz fwngz Daeglinz ca dawz aen daeh siuqva haenx, cienq ndang buet ok ndoengcuk. Ma daengz ranz, de daej daengz gyanghwnz, dawz vengq gaen’gyaeuj Daeglinz soengq hawj de diemj feiz coemh bae.

Gvaq geij ngoenz, dingqnyi mbanj doiq hamq dah gyoengqvunz doxlwnh, Daeglinz ngaiz baicuzsoj gaeb dawz bae gyaeng lo! Yienzlaiz, Daeglinz mbouj dwg bienqsim, de vih ra 5 fanh maenz hawj meh Dahfung, naemj ndaej uk luenh, raen ngaenz song ceh da luenz lumj ngveih maknganx nei, sou gyoengq boux- caegfaex song fanh maenz, gyoengqde daeuj caeg faex linzcangz, de cang rwznuk dafangz. Gvaqlaeng de yied ngeix yied simvueng, roxnyinh cungj saeh famhfap neix baenzlawz ndaej yomuenz gvaqbae ne? Ndigah, de haeb heuj bae yaeuh Dahfung le, gag bae baicuzsoj doiq ngaenz nyinh coih…… Dahfung lumj dingjgyaeuj deng byaj- cek, dingqnyi gij saeh neix doq bingh laemx lo. Rox Daeglinz ndaej daj baicuzsoj cuengq okdaeuj, de cij menhmenh ndei hwnjdaeuj.

Daeglinz mboujdanh nyinh loek, vanzlij coengh gingjcaz gaemhdawz gyoengq vunz caeg faex, yungh goeng boiz loek, baicuzsoj haemq vaiq couh cuengq de ma lo. Ndaw mbanj mbouj hawj de guh bouxhenfaex linzcangz lo, hoeng de mbouj simnaiq, ciq ngaenz youq laj dinbya diuz dah ciengx geij bak duz bit. Ngoenznaengz Dah- fung hwnj bya ra ywdoj, raen Daeglinz youq laj dah cauh bez ciengx bit、vanq muengx gaemh bya. Mbouj rox miz geijlai mbat, de daeuj daengz hamq dah ndoengcuk, siengj lumj doengh- baez caeuq Daeglinz eufwen, hoeng bak baez hai, couh lumj conghhoz deng oet, eu mbouj ok fwen.

Daxmeh rox de sij mbouj ndaej Daeglinz, ndatheiq fok de naeuz:“Mwngz baenzlawz mbouj nyienh dingq meh gangj ne? Doxaeu gij saeh hung ndaej guhcaemz ha? Mwngz vanzlij siengj caeuq lwg dairaq haenx doxndei, caen dwg uk luenh lo!”

“Mwngz cij dwg uk luenh……”

“Mwngz nyinhnaeuz lwg dairaq de lij ndaej gaij guh vunzndei ha? Duz ma ndaej gaij mbouj gwn haex? Couhcinj de gaij ndei, mwngz hix mbouj ndaej bae ra de!”

“Gou nyengh bae ra de, nyengh caeuq de doxndei!”

“Cungj vah neix gamj gangj ok bak, mwngz fatbag ha? Raen de cangguh geij ngoenz vunzndei doq gyaez, roxnaeuz raen de ciengx bang bit yawj dava ha? Boux vunz neix aeu giuh gim daeuj ram, cungj mbouj miz vunz haq hawj de!”

“Mbouj miz vunz haq cingq ndei, gou haq!”

De caeuq daxmeh aeuqheiq bak- nyengh, hoeng ndawsim lij miz di yaemhywx: Daeglinz rox gaij dauq guh vunzndei lwi? De mbouj dwg cangguh geij ngoenz vunzndei yaeuh vunz ba?

Vunz ndaw mbanj lwnh Daeglinz gak cungj vah mbouj noix. Mizmbangj naeuz baihhenz geij aen mbanj gyoengq bouxmoiz cungj bae cimh Daeglinz, doeng yah hawj de; mizmbangj naeuz haujlai dahsau haengj Daeglinz, gyanghwnz cungj bae hamq dah cimh de; mizmbangj naeuz gyoengq dahsau daeuj cimh Daeglinz, byawz rox Daeglinz cungj mbouj dam saek boux, ndawsim de haengjdingh miz dahsau ndeu, mbouj rox dwg byawz…… Gij vah neix lumj rwi youq gwnz dingjgyaeuj Dahfung mbin nei, hawj de simgip hoj youq, gig siengj daengz hamq dah bae cam Daeglinz. De baez ngeix youh laepda nyaenx youq, lumjbaenz lij deq maz.

Ngoenzneix banhaemh, Dahfung ganjhaw dauq, raen bakmbanj laj gorungz gyoengqvunz yawj bauqceij gangjgoj, lwnh daengz gienh saeh moq ndeu:

“Sou yawj, mbouj loek law caen dwg Daeglinz! Lwg maxlaeuz neix hwnj bauqceij lo!”

“Dwg mbouj dwg caen ha? Bauqceij yaenq loek la?”

“Bauqceij baenzlawz yaenq loek, lij miz mbawsiengq. Daeg neix mbouj dwg Daeglinz dwg byawz!”

Dahfung diuq gvaqbae, daj gwnz fwngz gyoengqvunz ciengj bauqceij ma yawj. Gwnz bauqceij sij——“Daeglinz famhfap, cunhveijvei mbouj hawj de guh bouxhenfaex linzcangz ndaw mbanj le, de mbouj simnaiq, yunghsim gaij loek dauq guh vunzndei. Ngoenz- lwenz, de dawz 5000 maenz ciengx bit ndaej gien hawj ndaw mbanj cawx faexlwg…… Cunhveijvei dauq hawj de guh bouxhenfaex linzcangz ndaw mbanj……”

De dawz bauqceij yawj geij baez, ndawsim lumj feiz dawz nei ndat- fwtfwt, naj bienq hoengzfwgfwg. De cuengq bauqceij doq buet bae ranz, dawz aen daeh siuqva, buet ok bakmbanj.

Gwnz dingj bya miz geij vengq fwjhoengz, lumj feizndoi dawzyagyag. Laj bya diuz dah sawwenwen, raemx dah laecamcam, ndoengfaex hamq dah gyoengq duzroeg heuhgiugiu. Dahfung daeuj daengz hamq dah ndoengcuk, dinghsim yawj aen daeh siuqva gwnz fwngz, haibak eufwen:

“Roegenq mbin baihnamz,

Baenznanz mbouj raennaj;

Ngoenzneix miz boengj vah,

Daengz henz dah menh gangj.”

Sing fwen dahsau lumj roegvenz ciuz, ndoengcuk saenq ndaej doengh- yoebyoeb, raemx dah fubfabfab. Doiq hamq dah caem yaep ndeu, cij cienz daeuj sing fwen daegmbauq:

“Ngoenzde doiq daehva,

Lij aeu gangj maz vah?

Mbouj caeuq nuengx raennaj,

Simdiuq naj youh mong.”

Ndoengcuk cienz ok sing fwen dahsau:

“Ronghndwen venj gyang mbwn,

Raeuz gaem fwngz dinghcingz;

Nuengx eu fwen beix dingq,

Muengh caensim hoiz vah.”

Songde youh itheij eufwen lo! Lij eu daengz buenq hwnz, roxnaeuz eu daengz mbwn rongh, cij songde gag rox ndwi lo.

(sat)