“Aulungzgveiz——”

“Mbouj siengj dingq hix aeu dingq!”

Aulungzgveiz gwnz ndang nyengq gvaqdaeuj, haep song da, gij myaiz haeu laeuj byoq daengz faj naj gou caez lo.

“Ndei, ndei, gou dingq, gou dingq!” Gou lau de gwn laeuj le youh yaek fatbag, doq ei de.

“Mwngz gaej dajduenh gou, caeux gangj ndaej sat couh caeux soengq mwngz dauqma, doeklaeng mwngz caiq menhmenh gangj hawj daiq mwngz dingq, yaek haeujsim, aeu nyi ndaej cingh, aeu geiq ndaej maenh.”

Gou moenghmangh yawj de, youq ndaw laep, gou cij raen de aj bak, mup ndaej gij heiq haeu laeuj caeuq haeusing nohngwz bongh okdaeuj.

Daihbet Aulungzgveiz Gangj Goj (Daih’it)

Doenghbaez——gij goj hainduj cungj baenzneix—— miz boux vunz ndeu, de mbouj miz daxboh. Gizsaed, haujlai nanz gaxgonq de couh mbouj miz daxboh lo.

15 bi gaxgonq, ha, lai bi dem, aiq dwg 16 bi gaxgonq ba!

Mwhhaenx, gaej gangj mwngz lij caengz okseng, lienz daxmeh mwngz lij mboujcaengz haq okbae ne! Goj gou couh daj 16 bi gaxgonq gangj, mwngz haeujsim nyi.

16 bi gaxgonq, Mbanjgyaeujdah miz bouxcoz he, coh de——heuh- guh——couh heuhguh Lungz Byauh ba, Lungz Byauh bihaenx ndaej 18 bi lo, maj ndaej sangset mbauqndei, de lij iq seiz ndaej hwnj hagdangz doegsaw, coengmingz raixcaix. Hoeng de ndaej 10 bi bihaenx, bang caeggeq haeuj mbanj daeuj, ciengjlued le cibgeij ranz, ranz de mboujdanh deng ciengj seuq, lienz daxboh de hix deng goenjcug bae lo, doeklaeng couh mbouj caiq ndaej raen daxboh de lo, dingqgangj daxboh de deng caeggeq gaj vut youq ndaw gamj bae gueng duzguk lo. Lungz Byauh mwhhaenx lij iq, mbouj rox maz dwg you, daxmeh de gag ciengx de, yienghyiengh cungj ei de, de lij ndaej gvaq gij ndwenngoenz cwxcaih, itcig daengz de ndaej 18 bi.

(caengz sat)