Ronghndwen daj gwnz dingj ndoi menhmenh benz hwnjdaeuj, gaen geij vengq fwj yaep ndoj yaep ok. Gyanghwnz ndaw mbanj caemrwgrwg, rog mbanj ndoeng henz dah, gyoengq hauxseng gyonjcomz eufwen.

Rumz ci sing fwen cienz daengz bakcueng, Dahfung najsaep naj- mbwng, gwnz fwngz gaem aen daeh siuqva ndeu, gag yawj ronghndwen danqheiq. De haujlai nanz mbouj gaen gyoengqdoih bae rog mbanj ndoeng henz dah caeuq fag hamq gyoengq daegmbauq eufwen lo.

Rog rug daxmeh ci naeuz:“Vaiqdi ninz lo, haetcog gaen meh bae ganj haw bw!”

Raen daxmeh byaij haeuj rug daeuj, Dahfung baez dacaengz daxmeh, ngaemgyaeuj mbouj oksing.

“Mbouj ndaej baenzneix euq, meh caeuq vunz gangj ndei lo.” Daxmeh byaij gvaqdaeuj ietfwngz lumh aen gyaeuj dahlwg, unqswnh lox bae lox dauq.

“Gou mbouj bae!” Dahfung mbwnjbak naeuz, simnyap bued faj fwngz daxmeh, ndwn gvaq baihhenz bae.

“Mwngz gangj maz? He, mwngz mbouj rox gij sim daxmeh? Mwngz yawj Dahcingz, lij nomj mwngz bi lai, ngoenzlwenz aemq lwg iq ma yawj goengda daxdaiq lo! Mwngz yiemz boux neix boux de, mwngz siengj haq hawj byawz?” Daxmeh hozndat mboenbyoedbyoed.

Gij vah daxmeh lumj diuz faex dub simdaeuz Dahfung. De ndatheiq caengz daxmeh, vah gangj mbouj ok bak. Daxmeh danqheiq mbouj daengx. Song bi gaxgonq seizcin miz haemh ndeu, gwnz mbwn ronghndwen lumj siensau riunyumnyum, youq henz dah ndoengcuk, de dawz aen daeh siuqva soengq hawj daegmbauq he.

Haetlaeng mbwn caengz rongh, daxmeh lij ninz gwnz congz, Dahfung couh aemq aen’gyoi laeglemx okdou. Byaij gvaq bak mbanj mbwn cij ngamq rongh, dauqcawq mokfoenfoen, de bin hwnj gwnz bya, daeuj daengz baih- laeng bya hamq dah ndoengcuk. Daengngoenz hoengzfwgfwg daj dingj gya bin hwnjdaeuj, ciuq raemx dah ronghsagsag, baihnaj dah gizde miz bit heuhhabhab. De rox dwg daegmbauq haenx daeuj lo, ndawsim miz di luenh, doq ndoj youq baihlaeng gocuk bae.

Bang bit hausaksak lumj faiq baenz duj baenz duj fouz gwnz raemx, baihlaeng gaen aen sez ndeu, boux daegmbauq gaem diuz faexsaux ndwn dwk, henz ndang cuengq aen rieng nem fan muengx ndeu. Daegmbauq neix heuhguh Daeglinz, gaxgonq guh bouxhenfaex linzcangz mbanjlaeng. 3 bi gaxgonq Dahfung hwnj bya daeuj ra ywdoj roxnaj de.

Bide seizdoeng, Dahfung ngoenz- naengz hwnj bya ra ywdoj. De mbwn caengz rongh hwnj bya, daengz mbwn laep cij dauq, daj haet daengz haemh cungj mbwng’yaeng’yaeng. Miz boux daegmbauq he youq gwnz bya eufwen cam de vihmaz simnyap, de ngaem- gyaeuj mbouj han. De baenzlawz miz simgei eufwen, geij bi neix daeuj vih hawj daxboh ywbingh, ndawranz gungz ndaej yaek gai rek dangq gu, doek- laeng daxboh yw mbouj ndei, dai lo, ndawranz lij yiemq geij fanh maenz. Seizneix de ngoenzngoenz hwnj bya ra ywdoj, baema gai hawj gyoengq lauxbanj daj baihrog daeuj sou ywdoj, rom ngaenz boizcaiq. De laihnaeuz swhgeij mbouj han, daegmbauq de couh mbouj leixlangh de lo, byawz rox baez raen de hwnj bya daegmbauq de couh eu. Daegmbauq de cij eu bya lawz、lueg lawz miz maz ywdoj. Haidaeuz de laihnaeuz daegmbauq de daeuq guhcaemz, deq de sawq bin gvaqbae, caen miz haujlai ywdoj. Mizseiz henz roen miz bog yw’nya ndeu, de rox dwg daegmbauq de bang de ra. De umj bog yw’nya, ndawsim raeujrubrub. Doeklaeng cij rox daeg- mbauq neix heuhguh Daeglinz.

Rumzcin ci daeuj vavengj hai seiz, songde couh mwngz gyaez gou ndiep, ngoenz ndeu mbouj ndaej raen mbat naj lumjbaenz biek 3 bi nei. Haemh ronghndwen luenz, youq henz dah ndoengcuk, Daeglinz dawz vengq soujgaen’gyaeuj ndeu soengq hawj Dahfung, Dahfung caemh soengq aen daeh siuqva ndeu hawj Daeglinz. Songde lij angqfwngfwng eufwen.

Daeglinz eu:

“Gou soengq baq hawj nuengx,

Ndoengcuk riuhaha;

Raeuz dinghcingz hamq dah,

Heuh raemx dah guhmoiz.”

Dahfung eu:

“Ronghndwen luenzraprap,

Sangjsak miz raq rumz;

Dingj bya deng raemx dumx,

Cungj mbouj lumz haemhneix.”

Daeglinz eu:

“Fwngz doxyien dinghcingz,

Caensim soengq hawj nuengx;

Gaem fwngz cungj mbouj cuengq,

Ngoenzngoenz muengh doxaeu.”

Dahfung eu:

“Ngoenzndei daeuj dinghcingz,

Cingj ronghndwen bang geiq;

Raeuz ngoenzngoenz doxndei,

Gvaq bak seiq mbouj bienq.”

Songde damzyoux deng meh Dahfung rox le, doq daeuj henz dah ndoengcuk cimh Daeglinz. Daeglinz youq hamq dah deq Dahfung, liuh mbouj daengz dwg meh Dahfung daeuj.

Meh Dahfung saeknaj laep- dwddwd byaij daengz dangqnaj Daeg- linz. “Mwngz caeuq Dahfung gou damzyoux, neix dwg saeh hung ciuhvunz, mbouj dwg guhcaemz gangjriu, vihmaz muenz gou ne?” De haibak doq gvaiq Daeglinz.

Naj Daeglinz ndatfwdfwd, ngaemgyaeuj mbouj oksing.

“Sou gaenq caegcaeg dinghcingz lo, gou guh daxmeh lij laengz couh mbouj gib le. Seizneix gou couh cam mwngz coenz vah ndeu, danghnaeuz mwngz aeu de guh yah, yaek hawj de gvaq ndaej ndei, mwngz guh ndaej daengz ma?”(caengz sat)